नेपालको राष्ट्रिय स्वाधीनता संकटमा, देशभक्तहरूको मोर्चाबन्दी आवश्यक: लिलामणि पोखरेल
मकालु खबर
काठमाडौँ । नेपाली कम्युनिष्ट पार्टीका नेता लिलामणि पोखरेलले नेपालको राष्ट्रिय स्वतन्त्रता र स्वाधीनता सङ्कटपूर्ण स्थितिमा रहेको बताएका छन् ।
उनले यो संकटबाट मुलुकलाई जोगाउनका लागि सबै देशभक्त शक्तिहरू र वामपन्थीहरूको नयाँ ध्रुवीकरण अपरिहार्य भएकोमा जोड दिएका हुन् ।
नेता पोखरेलले हालैका राजनीतिक उतारचढाव र ‘जेन–जी’ आन्दोलन स्वस्फूर्त नभई योजनाबद्ध भएको दाबी गरे ।
सन् २०११ मा अमेरिकी दूतावासले गठन गरेको ‘यूथ काउन्सिल’ मार्फत नेपाली युवाहरूलाई लक्षित गरी प्रभाव विस्तार गरिएको उनको आरोप छ । उनले अमेरिकी दूतावासले बनाएको यूथ काउन्सिल तत्काल खारेज गर्न माग गरे ।
उनले युवाहरूलाई विचार र राजनीतिबाट टाढा राखेर ‘हिप्नोटाइज’ गरिएको तर्क समेत गरे । पोखरेलले एमसीसी, आईपीएस र एसपीपीलाई अमेरिकी रणनीतिको हिस्सा भएको बताए । उनकाअनुसार अमेरिकाको उद्देश्य नेपालमा सैनिक ब्यारेक खडा गर्ने (एन्टी–चाइना इनसर्कलमेन्ट), दक्षिण एशिकयामा मोनिटरिङ सेन्टर बनाउने र नेपालमा रहेका बहुमूल्य ‘रेयर अर्थ मेटेरियल’ (दुर्लभ खनिज) माथि आँखा गाड्नु रहेको छ ।
उनले भने ‘हामी एक्लाएक्लै रह्यौँ भने देश हामीले सोचेजस्तो स्वतन्त्र र सार्वभौम रहने छैन । मुलुकको स्थायित्वका लागि काँग्रेस, कम्युनिष्ट वा अरू कुनै पनि देशभक्त शक्ति एक ठाउँमा उभिनैपर्छ । नेपाली भूमिमा युवाहरूलाई लक्षित गरेर दूतावासले संगठन बनाउन पाइन्छ कि पाइन्न ? के हामीले अमेरिकामा गएर त्यसरी संगठन बनाउन पाउँछौँ रु चीन र भारत हाम्रा छिमेकी हुन्, उनीहरूले सुरक्षाको कुरा उठाउनु स्वाभाविक होला, तर ८ हजार माइल टाढा रहेको अमेरिकाले नेपालसँग कुन सुरक्षा स्वार्थमा सम्झौता र शुभकामना दिनुपर्ने हो ?’
नेता पोखरेलले वर्तमान सरकार र अर्थमन्त्रीको कार्यशैलीमाथि पनि कडा आलोचना गरे । अर्थमन्त्रीले संविधान विपरीत ‘नव–उदारवादी’ अर्थतन्त्रको कुरा गरेको भन्दै उनले नेपालको संविधानले मिश्रित अर्थतन्त्र (निजी, सहकारी र सार्वजनिक) लाई मात्र स्वीकार गर्ने स्पष्ट पारे । निर्वाचनको परिणाम र परराष्ट्र सम्बन्धको चर्चा गर्दै उनले ‘एल्गोरिदम’ र ‘पोलिटिकल मास हिस्टेरिया’ का कारण चुनावी नतिजा प्रभावित भएको बताए ।
उनले विचारमा मतभेद भएपनि राष्ट्रियताको सवालमा सबै वामपन्थी र देशभक्तहरू एक हुनुको विकल्प नरहेको बताए ।
मकालु खबर
