पुरानो शैली छाडौँ, नयाँ बाटोमा लागौँ : डा. तोसिमा कार्की

काठमाडौं । राष्ट्रिय स्वतन्त्र पार्टी (रास्वपा) की नेतृ तथा पूर्व स्वास्थ्य राज्यमन्त्री डा. तोसिमा कार्कीले नेपालको वर्तमान राजनीतिक अवस्थामा गम्भीर प्रश्न उठाएकी छिन् । लोकतन्त्र र गणतन्त्रको रक्षाका साथै सुशासनको सुनिश्चितताका लागि रास्वपाले महत्वपूर्ण भूमिका खेल्नुपर्नेमा उनले जोड दिएकी हुन् ।

वर्तमान राजनीतिक संरचना र नेतृत्वप्रति जनतामा देखिएको वितृष्णालाई सम्बोधन गर्दै रास्वपा नयाँ आशाको केन्द्र बन्न सक्ने उनको भनाइ छ । डा. कार्कीले देशको अग्रगामी यात्रामा विभिन्न चुनौतीहरू रहेको औंल्याउँदै यसमा रास्वपाको नेतृत्वदायी भूमिका अपरिहार्य रहेको बताइन् । उनले सामाजिक सञ्जालमार्फत भनेकी छन्, ‘हामीले जनताको विश्वास जितेर नयाँ नेपाल निर्माणको सपना साकार पार्नुपर्छ । सुशासन, पारदर्शिता र जवाफदेहिता हाम्रो मूलमन्त्र हुनुपर्छ ।’

पहिचान र समावेशीकरणको मुद्दामा पनि डा. कार्कीले सशक्त आवाज उठाएकी छिन् । उनले भनिन्, ‘जात, धर्म, लिङ्ग वा क्षेत्रका आधारमा हुने कुनै पनि विभेद अब सह्य हुँदैन। हामीले सबैलाई समान अवसर र सम्मान सुनिश्चित गर्नुपर्छ ।’

युवा नेतृत्वको आवश्यकतामाथि जोड दिँदै डा. कार्कीले देशको भविष्य निर्माणमा युवाहरूको भूमिका महत्वपूर्ण हुने बताइन् । ‘अब पुराना राजनीतिक शैली र नेतृत्वबाट मात्र देशले गति लिन सक्दैन,” उनले थपिन्, “नयाँ सोच र ऊर्जाका साथ अगाडि बढ्ने बेला आएको छ ।’

रास्वपाले देशमा सकारात्मक परिवर्तन ल्याउनका लागि राजनीतिक र संरचनात्मक सुधारमा ध्यान दिनुपर्ने डा. कार्कीको सुझाव छ । उनले भनिन्, ‘परम्परागत राजनीतिले अब काम गर्दैन। हामीले जनताका वास्तविक आवश्यकताहरूलाई सम्बोधन गर्न सक्ने नयाँ राजनीतिक प्रणाली विकास गर्नुपर्छ ।’