महिला प्रहरीलाई ‘तिम्रो फिगरको फ्यान हुँ’ भन्ने इन्स्पेक्टरमाथि छानबिन गर्न बन्यो समिति
मकालु खबर
काठमाडौँ । इन्स्पेक्टर सुवास तिमिल्सिनामाथि छानबिन अघि बढेको छ । जिल्ला प्रहरी कार्यालय कास्कीमा कार्यरत तिमिल्सिनाले मातहतकै महिला प्रहरीलाई आपत्तिजनक म्यासेज पठाएको बाहिरिएपछि छानबिन अघि बढेको हो ।
पीडित महिला प्रहरीले इन्स्पेक्टर तिमिल्सिनाले पठाएको भनिएको म्यासेजको स्क्रिनसट ट्विटरमा पोष्ट गर्दै आफूलाई असुरक्षित बनाएको उल्लेख गरेकी थिइन् । ‘सुरक्षा सेवक भएर उनले महिलामा असुरक्षा पैदा गरिरहेका छन्, नेपाल प्रहरीको शक्तिमार्फत,’ ती महिलाले भनेकी छन् ।
उनले पोष्ट गरेको स्क्रिनसटमा तिमिल्सिनाले आफू ती महिला प्रहरीको ‘फिगरको फ्यान’ भएको, फोटो पठाउन अनुरोध गरेकालगायत म्यासेज छन् । ट्विटर ह्याण्डलमा उक्त विवरण सार्वजनिक भएलगत्तै कास्की प्रहरीले छानबिन गर्न समिति गठन गरेको हो ।
इलाका प्रहरी कार्यालय शिसुवामा कार्यरत डिएसपी प्रकाश दाहालको संयोजकत्वमा इन्सपेक्टरदेखि प्रहरी जवानसम्म सदस्य रहेको छानबिन समिति गठन गरेको कास्कीका प्रहरी प्रमुख एसपी अजय केसीले बताए । ‘इन्स्पेक्टरले म्यासेज पठाएको हो कि होइन, हामी साइबर ल्याबबाटै छानबिन गर्छौं,’ एसपी केसीले भने, ‘छानबिनबाट दोषी देखिए कारबाही अघि बढ्छ ।’
Being a security servant he is creating insecurities for women through his power of Nepal Police. Kaski Police inspector @NepalPoliceHQ @Online_khabar @ekantipur_com @PahiloPost @setopati pic.twitter.com/TOdSgjGjAS
— Aba bolne (@bolne_aba) June 27, 2023
घटना सार्वजनिक भएलगत्तै तिमिल्सिनाले कास्कीका प्रहरी प्रमुखसमक्ष निवेदन दिएका छन् । उनले आफ्नो अकाउण्ट ह्याक भएको दाबी गरेका छन् । छानबिन गरेर कारबाही गर्न उनको निवेदनमा माग गरिएको छ ।
मकालु खबर
