सरकारले दलहरुमाथि प्रतिशोधपूर्ण आक्रमण गर्यो, प्रतिवाद गर्छौंः ओली
मकालु खबर
काठमाडौं । नेकपा (एमाले)का अध्यक्ष केपी शर्मा ओलीले सरकारले राजनीतिक दलहरुमाथि प्रतिशोधपूर्ण आक्रमण गरिरहेको आरोप लगाएका छन् ।
नेपाल कम्युनिष्ट पार्टी (नेकपा) का संस्थापक महासचिव पुष्पलालको ४८ औँ स्मृति दिवसको अवसरमा काठमाडौंमा आयोजित कार्यक्रमलाई सम्बोधन गर्दै उनले यस्तो आरोप लगाएका हुन् । उनले सरकारले आफूमाथि प्रतिशोध साँधेर पूर्वाग्रहपूर्ण व्यवहार गरेको आरोप लगाए ।
उनले मुद्दा चलाउने आधारबिना आफूलाई १५ दिनसम्म हिरासतमा राखेदेखि राजनीतिक प्रतिशोधको श्रृंखला नरोकिएको टिप्पणी गरे । सरकारले दलहरुलाई परामर्शबाट बाहिर राख्ने, अनादर गर्ने, कुप्रचार गर्ने र झुटा आरोप लगाउने कार्य गरिरहेको आरोप लगाउँदै उनले त्यसको प्रतिवादमा उत्रिनुपर्ने बताए ।
‘अहिले राजनीतिक दलहरू गत वर्षको भदौ २३ र २४ गतेबाट नै आक्रमणको सिकार भएका छन् । सरकार बन्ने बित्तिकै पूर्वप्रधानमन्त्रीलाई फलानालाई गिरफ्तार गर्ने भन्ने निराधार, पूर्वाग्रहपूर्ण दुनियाँमा कहीँ पनि हुँदैन,’ उनले भने, ‘निराधार गिरफ्तार गर्ने निर्णय गरेर रातभरि लगाएर बिहानको राति नै निर्णय कार्यान्वयन गर्ने ठाउँमा पुगे । अवैध ढंगले १५ दिन १३ दिन मलाई हिरासतमा राख्ने काम किन ? सरकारले केही पनि मुद्दा त चलाउन सकेन ।’
अगाडि उनले भने, ‘गजब छ, अदालतको बारेमा म केही भन्न चाहन्न । त्यसयता अब के–के घटना भए कुरै नगरौँ । रमेश लेखकलाई गिरफ्तार गरियो, केही पनि छैन, छुट्यो । विष्णु पौडेलजी नेकपा एमालेका उपाध्यक्ष, पूर्वअर्थमन्त्री, उपप्रधानमन्त्रीजी पार्टीको कामको सन्दर्भमा सुर्खेत पुग्नुभएको थियो, उहाँलाई गिरफ्तार गरियो । भोलि बिहानै उहाँ काठमाडौं आउँदै हुनुहुन्छ भन्ने थाहा हुँदाहुँदै सरकारले गिरफ्तार गरेर काठमाडौंँ ल्यायो । यो कस्तो प्रतिशोध हो ? कता जाँदैछ देश ? त्यसकारण लोकतन्त्र फर्काउनुपर्नेछ । राजनीतिक दलहरूलाई अनादर, उपेक्षा, अपहेलना गरेर र घृणाको पात्र बनाएर, कुप्रचार गरेर, झुटा आरोप थोपरेर चलेको छ । यस्ता कुराको प्रतिवाद गर्नुपर्छ ।’
उनले दलहरुले संविधान र व्यवस्थाको लागि लड्नुपर्ने आवश्यकता रहेको भन्दै आन्तरिक विवादमा नअल्झिन समेत आग्रह गरे ।
मकालु खबर
