बेलायतवासी नेपालीलाई नेपाल फर्किन प्रधानमन्त्रीको आह्वान
मकालु खबर
जेठ २९, लण्डन । प्रधानमन्त्री केपी शर्मा ओलीले बेलायतमा रहेका नेपालीहरुलाई नेपाल फर्कन आह्वान गरेका छन् ।
बेलायत भ्रमणमा रहेका प्रम ओलीले बुधबारलण्डनस्थित नेपाली राजदूताबासमा आयोजित कार्यक्रमलाई सम्बोधन गर्दै त्यहाँ अवस्थित सबै नेपालीहरुलाई नेपाल फर्कन आग्रह गरेका हुन् ।
null
कार्यक्रमलाई सम्बोधन गर्दै उनले भने, ‘नेपालीहरु आफू बसेको ठाउँ र देशको परम्पराको सम्मान गर्छन् । जहाँ बसे पनि नेपाललाई माया गर्नुहोस् । त्यहाँ कमाएको सीप, ज्ञान तथा सम्पत्ति लिएर नेपालै फर्किनुहोस् ।’
प्रम ओलीले आफ्नो बेलायत भ्रमण सफल भएको दाबी गर्दै त्यहाँ अवस्थित गोर्खा सैनिकको प्रशंसा पनि गरे । उनले गोर्खा सैनिकको बहादुरीको प्रसंग निकाल्दै गोर्खा सैनिकको बहादुरीका कारण बन्दुक देख्दा नतर्सिनेहरु खुकुरी देख्दा तर्सिने गरेको पनि स्मरण गराए ।
प्रधानमन्त्री ओलीको सम्मान र स्वागतका लागि बेलायतका विभिन्न शहरहरुबाट सयौं नेपालीहरु लण्डनस्थित नेपाली राजदूताबासमा उपस्थित भएका थिए ।
त्यहाँको कार्यक्रम सकेर प्रधानमन्त्री ओली फ्रान्स प्रस्थान गरिसकेका छन् । आजदेखि जेठ ३१ गतेसम्म प्रधानमन्त्री ओली फ्रान्स भ्रमणमा रहने छन् ।
भ्रमणका क्रममा उनले पेरिसमा आफ्ना समकक्षी इदोवार्ड फिलिपसँग भेटवार्ता गर्ने कार्यक्रम छ ।
मकालु खबर
