वर्षमान पुनलाई लक्षित गरी आइतबार रोल्पामा गोली प्रहार

“

कार्तिक २६, रोल्पा । माओवादी केन्द्रका नेता तथा रोल्पाका प्रतिनिधिसभा सदस्य उम्मेदवार वर्षमान पुन अनन्तलाई लक्षित गरी आइतबार रोल्पामा गोली प्रहार भएको छ ।

दुई खोली गाउँपालिकाको बाघमारामा आयोजित चुनावी सभामा भाग लिन जाने क्रमम केवरी खोलाको जङ्गलमा दिउँसो अपरिचित व्यक्तिको समूहले गोली हानेको प्रहरीले जनाएको छ । पुनलार्इ लक्षित गरी लगातार फायरिङ भएपछि पुनका सुरक्षाकर्मीले जवाफी फायरिङ गरेको जिल्ला प्रहरी कार्यालय रोल्पाका प्रहरी निरीक्षक सुदर्शन पन्थीले जानकारी दिए ।

दुईखोली गाउँपालिकाकै राङ्सीमा चुनावी कार्यक्रम सकेर बाघमारातर्फ जाँदै गर्दा भिरबाट ढुंगामुढा समेत भएको थियो । ढुंगामुढापछि सुरक्षाकर्मीले १० राउण्ड फायरिङ गरेका थिए । चुनावी प्रचारमा पुनसँग रोल्पाका बाम गठबन्धनका अन्य उम्मेदवार तथा नेताहरू पनि थिए । पुन चढेको गाडीलाई लक्षित गरेर शनिवार पनि माडी गाउँपालिकामा एम्बुस अर्थात् विद्युतीय धराप विस्फोट गराइएको थियो । एम्बुुसमा परेर पुन चढेको गाडीमा क्षति पुगेको थियो ।

“