विशेष महाधिवेशनको तरंगबीच कांग्रेसले आज धारणा सार्वजनिक गर्दै, शीर्ष नेताहरू एकै मञ्चमा

काठमाडौं । नेपाली कांग्रेसभित्र महामन्त्रीद्वयले विशेष महाधिवेशनको माग गरेपछि उत्पन्न आन्तरिक तरंगलाई साम्य पार्न नेतृत्व तह सक्रिय भएको छ । यसै सन्दर्भमा कांग्रेसका कार्यवाहक सभापति पूर्णबहादुर खड्काले आज (शुक्रबार) विशेष पत्रकार सम्मेलनको आयोजना गरेका छन् ।

ललितपुरको सानेपास्थित पार्टी केन्द्रीय कार्यालयमा दिउँसो १ बजे हुने उक्त पत्रकार सम्मेलनमा कार्यवाहक सभापति खड्कासँगै नेता डा. शेखर कोइराला लगायतका शीर्ष नेताहरूको उपस्थिति रहने बताइएको छ । पार्टीभित्र देखिएको पछिल्लो विवाद र नेतृत्वको आधिकारिक धारणा सार्वजनिक गर्न यो सम्मेलन आयोजना गरिएको हो ।

केही दिनअघि महामन्त्रीद्वय गगन थापा र विश्वप्रकाश शर्माले विशेष महाधिवेशनको माग अघि सारेपछि पार्टी पंक्तिमा नयाँ बहस सिर्जना भएको थियो । तर, बिहीबार बसेको बैठकले तत्काल विशेष महाधिवेशनमा जानु पार्टी हितमा नहुने निष्कर्ष निकालेको छ । नेता डा. कोइरालाले बिहीबार नै सभापति शेरबहादुर देउवासँग भेट गरी विवाद मिलाउन र पार्टीलाई एक ढिक्का बनाएर लैजान आग्रह गरेका थिए ।

कांग्रेसले निर्वाचनपछि हुने नियमित महाधिवेशनमै पार्टी सुधारका एजेन्डाहरूमाथि खुला छलफल गर्न सकिने जनाएको छ । हतारमा गरिने निर्णयले पार्टीको आन्तरिक एकतामा आघात पुग्न सक्ने भन्दै महाधिवेशनको कार्यतालिका अनुसार अघि बढ्ने सन्देश दिन आजको पत्रकार सम्मेलन केन्द्रित हुने देखिन्छ । बिहीबारको बैठकले पनि नियमित प्रक्रिया बाहेकका अन्य गतिविधि नगर्न नेता-कार्यकर्तालाई निर्देशित गरिसकेको छ ।