बीपी राजमार्ग अवरुद्ध हुँदा हजारौं यात्रु अलपत्र

काभ्रेपलाञ्चोक । अविरल वर्षाका कारण बीपी राजमार्गको काभ्रेपलाञ्चोक खण्डमा गएको पहिरो र लेदोले गर्दा राजमार्ग शुक्रबार बिहानदेखि अवरुद्ध भएको छ । यसले गर्दा पूर्वबाट काठमाडौं आउने र काठमाडौंबाट पूर्व जाने यात्रुहरू बीच बाटोमै अलपत्र परेका छन् ।

इलाका प्रहरी कार्यालय मंगलटारका प्रमुख प्रहरी निरीक्षक इश्वर कार्कीका अनुसार, राजमार्गको चौकीडाँडा, चारसयबेसीको नाङसाल क्रसर, बोक्सीकुना र माम्तीमा ठूला पहिरो खसेका छन् । त्यसैगरी, नार्के, पिन्थलीबेशी, विरुवाडाँडा, डालाबेशी लगायतका स्थानमा लेदो माटोले सडक ढाकेको छ । विशेष गरी, माम्तीको तल्लो भेगमा गत असोजमा सडक बगेर बनाइएको डाइभर्सनमा लेदोसहितको बाढी पसेकाले समस्या थप जटिल बनेको छ ।

राजमार्ग खुलाउनका लागि आवश्यक पहल भइरहेको भए पनि, ठूलो मात्रामा खसेको पहिरो र लेदो हटाउन केही समय लाग्ने प्रहरीले जनाएको छ । सडकको अवस्था सामान्य नभएसम्म यात्रा जोखिमपूर्ण हुने भएकाले प्रहरीले यात्रुहरूलाई सडकको जानकारी लिएर मात्र यात्रा गर्न अनुरोध गरेको छ ।