सरकारी लेटरहेडमा ‘श्री ५’ प्रयोग, वास्तोलाको पद गुम्यो

काठमाडौँ । नेपाल सरकारको लेटरहेडमा ‘श्री ५’ को सम्बोधन प्रयोग गर्दै पूर्वराजाको समर्थनमा विज्ञप्ति जारी गरेका रमेशराज वास्तोला पदमुक्त भएका छन् । उनी पोर्चुगलको लिजवन सहरका पर्यटन प्रवर्द्धकका रूपमा कार्यरत थिए ।

संस्कृति, पर्यटन तथा नागरिक उड्डयन मन्त्रालयले उक्त विषयमा स्पष्टीकरण माग गरेको थियो । तर, वास्तोलाको जवाफ सन्तोषजनक नभएको ठहर गर्दै मन्त्रालयले उनलाई पदबाट हटाउने निर्णय गरेको हो ।

मन्त्रालयका सहायक प्रवक्ता एवम् सूचना अधिकारी गोकर्ण प्रसाद उपाध्यायद्वारा जारी विज्ञप्तिअनुसार, कार्यविधि २०७९ को दफा ५ अनुरूप २०८१ फागुन २५ गते लिखित स्पष्टीकरण सोधिएको थियो । तर, प्राप्त जवाफ चित्तबुझ्दो नदेखिएपछि मन्त्रीस्तरीय निर्णयअनुसार फागुन २६ गते उनलाई जिम्मेवारीबाट हटाइएको जानकारी दिइएको छ ।