गठ्ठाघरमा चेकजाँचको क्रममा दुर्घटना भएपछि स्थानीय आक्रोशित, ट्राफिक प्रहरीमाथि नै ढुंगामुढा

काठमाडौं । भक्तपुरस्थित गठ्ठाघरमा मालवाहक ट्रकले स्कुटर चालकलाई ठक्कर दिँदा एक महिलाको मृत्यु भएको छ । ट्राफिक प्रहरीकै सामु ट्रकले स्कुटर चालकलाई किचेपछि स्थानीयबासी आक्रोशित भएका छन् । स्थिति तनावग्रस्त बनेको छ ।

प्रत्यक्षदर्शीका अनुसार गठ्ठाघर चोकमा ट्राफिक चेकजाँचको क्रममा रोकिएको स्कुटरलाई तीव्र गतिमा आएको ट्रकले ठक्र दिएर घिसारेको थियो । केही प्रत्यक्षदर्शीले सुरुमा खुट्टामा मात्र किचेको र पछि फेरि ब्याक गरेर किचेको दाबीसमेत गरेका छन् ।

त्यसपछि भने स्थानियवासीहरू आक्रोशित हुँदै प्रहरीमाथि ढुंगामुढा गरेर ट्राफिक प्रहरीलाई लखेटे । प्रदर्शनकारीले ट्रकमाथि आगजनीसमेत गरे तर केहीबेरमा आगो भने निभाइएको थियो ।

मृतक स्कुटर चालक महिलाको पहिचान खुलेको छैन ।