ब्याडमिन्टनको मेन्स टिममा नेपाल पराजित

काठमाडौँ । प्रिन्स दाहाल सम्मिलित नेपालको पुरुष ब्याडमिन्टन टोली हानझाओमा जारी १९औँ एसियाली खेलकुदको पुरुष टिम प्रतिस्पर्धाबाट बाहिरिएको छ ।

बिनजियाम जिम्नाजियममा शुक्रवार भएको क्वार्टरफाइनलमा नेपाली टोली भारतसँग २–० को सोझो सेटमा पराजित हुँदै बाहिरिएको हो ।

पहिलो खेलमा मालदिभ्सलाई हराउँदै भारतसँग भेट पक्का गरेको नेपाली टोलीको प्रदर्शन सन्तोषजनक रहेन ।

यु–१९ विश्व वरीयतामा पूर्वनम्बर एक खेलाडी प्रिन्सको टोलीले निरिहपूर्ण प्रदर्शन गर्याे । सबैभन्दा पहिला खेलका प्रिन्स भारतका लक्ष्य सेनसँग २१–५ र २१–८ ले पराजित भए ।

दोस्रो सेटमा सुरुआती अग्रता लिएका प्रिन्सले त्यसलाई कायम राख्न सकेनन् । उक्त सेट पनि उनले सहजै गुमाउन पुगे ।

दोस्रो खेल खेल्न आएका सुनिल जोशीको प्रदर्शन पनि निरासपूर्ण रह्यो ।

उनले श्रीकान्त किदाम्बीसँग पहिलो सेट २१–४ ले सहजै गुमाए ।

दोस्रो सेटमा उनले सुधारिएको खेल देखाए पनि आफ्नो पक्षमा पार्न सकेनन् ।

उक्त सेट पनि सुनिलले २१–१३ ले गुमाएपछि नेपालको हार पक्का भयो ।

तेस्रो खेलमा विष्णु कटुवालले मिथुन मन्जुनाथसँथ २१–२ र २१–७ ले हार व्यहोरेपछि नेपालले मेन्स टिम प्रतिस्पर्धा ३–० ले गुमायो ।