चौथो मिस्टर बुल्समेन राष्ट्रिय शारीरिक सुगठन हुँदै

काठमाडौँ । चौथो मिस्टर बुल्समेन खुला राष्ट्रिय शारीरिक सुगठन प्रतियोगिता आगामी आसोज ६ गतेदेखि सुरु हुने भएको छ ।

प्रत्येक दुई वर्षको अन्तरमा बुल्समेन क्लब पोखराको आयोजनामा हुँदै आएको प्रतियोगिता आगामी शुक्रवार र शनिवार सानेपास्थित हेरिटेज गार्डेन सञ्चालन हुने भएको हो ।

बुधवार बुल्समेन क्लब पोखराले काठमाडौँमा पत्रकार सम्मेलन आयोजना गर्दै प्रतियोगिताको बारेमा जानकारी दिएको थियो । वि.सं. २०७१ सालदेखि सुरु भएको प्रतियोगिताको दोस्रो संस्करण २०७३ सालमा भएको थियो । २०७५ सालमा तेस्रो संस्करण भएपनि चौथो संस्करण भने निर्धारित समयमा नै हुन सकेन ।

२०७७ मा हुनुपर्ने चौथो संस्करण कोरोना महामारीका कारण हुन नसकेको हो । यस अघिका संस्करण पोखरामा आयोजना भएपनि आयोजकले पहिलो पटक उपत्यका केन्द्रित गर्दै प्रतियोगिता सञ्चालन गर्न लागेको छ ।

आयोजकका अध्यक्ष नुना गुरुङले प्रतियोगितालाई देशव्यापी रूपमा बनाउँदै प्रायोजक भित्राउने उद्देश्यअनुरूपमा उपत्यकामा खेल आयोजना गरिएको बताए । प्रतियोगितामा पुरुषतर्फ बडी बिल्डिङमा ५५ केजी, ६० केजी, ६५ केजी, ७० केजी, ७५ केजी, ८० केजी तौलसमूह र ८० केजी तौलमाथि समूहमा प्रतिस्पर्धा हुनेछ ।

पुरुषको फिजिकलमा एक सय ७० सेमीभन्दा माथि र तल गरी नौ विधा समावेश गरिएको छ । महिलामा भने वेल्नेस र फिजिकलमा खुला प्रतिस्पर्धा हुनेछ । बडी बिल्डिङमा ओभरल च्याम्पियनले पाँच लाख रुपैयाँसहित ट्रफी, मेडल, प्रमाणपत्र प्राप्त गर्नेछ ।

प्रत्येक तौल समूहका विजेताले ३५ हजार, दोस्रोले २५ हजार र तेस्रोले २० हजार रुपैयाँ पाउनेछन् । पुरुष तथा महिला फिजिकतर्फका विजेतालाई एक लाख, उपविजेता ५० हजार र तेस्रो हुनेले ३५ हजार रुपैयाँ प्रदान गरिनेछ । प्रतियोगिता आयोजना गर्न ६५ लाख खर्च हुने आयोजकको अनुमान छ ।

त्यस्तै आयोजकले प्रतियोगिताबाट करिब १५ लाख बचत हुने र सो रकम शारीरिक सुगठनको विकास र बुल्समेन खेलाडी अक्षयकोष स्थापना गरी खेलाडीको हकहितका लागि खर्च गर्ने जनाएको छ । प्रतियोगितामा उपत्यका बाहिरका खेलाडीलाई तीन हजार भत्ता दिने र उनीहरूसँग दर्ता शुल्क एक हजार रुपैयाँ लिने आयोजकका अध्यक्ष नुना गुरुङले जानकारी दिए । प्रतियोगिताका लागि अहिलेसम्म एक जना खेलाडीले नाम दर्ता गरिसकेका छन् ।