गृहमन्त्रीको नेतृत्वमा ‘विप्लव’ नेतृत्वको नेकपासँग वार्ता

काठमाडौँ । सरकार र नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा) बीच विगतका सहमति कार्यान्वयन गर्ने सम्बन्धमा वार्ता भएको छ । गृहमन्त्री बालकृष्ण खाणको पहलमा मंगलबार गृह मन्त्रालयमा वार्ता भएको हो । वार्तामा मुख्य गरी दुई विषयमा छलफल भएको गृह सचिव टेकनारायण पाण्डेले जानकारी दिए ।

पाण्डेका अनुसार ‘मुद्दाको अवस्थाको बारेमा दुवै पक्षबाट विगतमा पेस भएको सूचीमा पछिल्लो समयसम्म भएको प्रगतिसमेतका आधारमा ‘भेरिफाइ’ गरी अन्तिम सूची तयार गर्ने’ विषयमा दुवै पक्ष सहमत भएका छन् । त्यसैगरी पाण्डेले ‘तयार भएको अन्तिम सूचीका आधारमा बाँकी रहेका मुद्दाहरूलाई कसरी किनारा लगाउन र बन्दीहरूलाई रिहा गर्न सकिन्छ, त्यसको प्रशासनिक, कानुनी र प्राविधिक निकास निकाल्ने गरी अर्को बैठक बस्ने,’ निष्कर्ष निस्किएको जानकारी दिए ।

वार्तामा नेपाल सरकारको तर्फबाट गृहमन्त्री खाँणसहित महान्यायाधिवक्ता खम्मबहादुर खाती, गृह सचिव पाण्डे, कानून, न्याय तथा संसदीय मामिला मन्त्रालयका सचिव उदयराज सापकोटा र गृह मन्त्रालयका कानून सहसचिव कमल खत्री सहभागी थिए । नेकपाको तर्फबाट पार्टी प्रवक्ता खड्कबहादुर विश्वकर्मा ‘प्रकाण्ड’ सहभागी थिए ।

वार्तापछि नेकपाका प्रवक्ता प्रकाण्डले वार्ता सकारात्मक रूपमा अघि बढेको जानकारी दिए । ‘वार्ता सकारात्मक रूपमा अघि बढेको छ । यसअघि सरकार र पार्टीको वार्ता टोलीबिच भएको सहमतिलाई टुङ्ग्याउन सरकार र विषेशगरी गृहमन्त्रीले पहल कदमी लिइरहनु भएको छ, त्यो सराहनीय छ,’ प्रकाण्डले भने, ‘आन्तरिक रूपमा दुवै पक्षले सहमति गरेर अर्को बैठकमा टुङ्ग्याउने गरी उठेका छौँ । सरकारले गर्नु पर्ने काम केही धेरै छन् । हामीले गर्ने काम पनि छन् । दुवै पक्ष सकारात्मक भएकाले अर्को बैठकमा टुङ्गिने आशा गरौँ ।’

गृहमन्त्री खाँणले आइतबार नेकपासँग नेपाल सरकारले गरेको सहमति कार्यान्वयनका लागि कानून, न्याय तथा संसदीय मामिलामन्त्री दिलेन्द्रप्रसाद बडु, सचिव उदयराज सापकोटा, महान्यायाधिवक्ता खम्मबहादुर खाती र गृह सचिव टेकनारायण पाण्डेसँग छलफल गरेका थिए । गृहमन्त्री खाँणको पहलमा अन्य तयारी गरेर आज पुनः नेकपासँग बैठक बसे को हो ।

सरकार र नेपाल कम्युनिष्ट पार्टीबीच २०७७ फागुन २० गते तीन बुँदे सहमति भएको थियो । मुख्यगरी सहमतिको बुँदा नम्बर तीनमा रहेको ‘नेपाल सरकार, नेपाल कम्युनिष्ट पार्टीमाथि लगाइएको प्रतिबन्ध हटाउन, कारागारमा रहेका पार्टीका नेता तथा कार्यकर्ताहरूको रिहाइ र सम्पूर्ण मुद्दाहरू खारेज गर्न सहमत भएको छ,’ भन्ने विषय मिलाउन बाँकी छ । सहमतिका अन्य दुई बुँदा सैद्धान्तिक विषय केन्द्रित छन् ।

०७७ फागुन २० गते सरकारका तर्फबाट वार्ता टोलीका संयोजक तत्कालीन गृहमन्त्री रामबहादुर थापा र सदस्य तत्कालीन प्रधानमन्त्री केपी शर्मा ओलीका विदेश मामिला सल्लाहकार डा‍. राजन भट्टराई तथा नेकपाको तर्फबाट वार्ता टोलीका संयोजक पार्टी प्रवक्ता प्रकाण्ड र सदस्य पार्टी केन्द्रीय समिति सदस्य दिपकले तीन बुँदे सहमतिमा हस्ताक्षर गरेका थिए ।

नेकपाका नेताहरूले वर्तमान सरकार बनेपछि प्रधानमन्त्री शेरबहादुर देउवा, सत्ता गठबन्धन दल नेकपा (माओवादी केन्द्र)का अध्यक्ष पुष्पकमल दाहाल, नेकपा (एकीकृत समाजवादी) का अध्यक्ष माधवुकमार नेपाल, गृहमन्त्री खाणँसहितलाई भेटेर अघिल्लो सरकारले गरेको सहमति कार्यान्वयन गर्न माग गरिरहेका छन् ।