इंग्लिस टीम : उपाधिको आश तर त्रासै त्रास

काठमाडौं । युरो २०२० को सेमिफाइनलमा डेनमार्कलाई हराउँदै फाइनल पुग्नु समर्थकका लागि खुसीको कुरा हो । तर धेरैको अनुमानअनुसारकै नतिजा आएपनि खेलमा इंग्लयान्डले आशा गरेजस्तो पकड कायम राख्न भने सकेन । घरेलु मैदान र दर्शकको फाइदामा रहेको इंग्ल्यान्डसँग डेनिस टीमले बहादुरीपूर्ण प्रदर्शन गर्‍यो । अतिरिक्त समयमा इंग्ल्यान्ड भाग्यमानी बन्यो ।

रहिम स्टर्लिङमाथिको फल डेनमार्कलाई महँगो पर्‍यो । यसैकारण पाएको पेनाल्टीमा ह्यारी केनले गोल गरे । उनको प्रहार डेनिस गोलकिपरले बचाएपनि उनले पन्च गरेर रिबाउन्ड भएको बललाई केनले पोस्टको दिशा दिए । भलै, इंग्ल्यान्डलाई यो पेनाल्टी दिने निर्णयको आलोचनाहरू पनि प्रशस्तै भइरहेका छन् ।

डेनमार्कसँगको जितपछि इंग्ल्यान्ड ५५ वर्षपछि मुख्य प्रतियोगिताको फाइनलमा पुग्यो । त्यसो त इंग्ल्यान्डलाई घरेलु मैदानमा सधैं दाबेदार मानिन्छ । इंग्ल्यान्डले पाएकामध्ये धेरैजसो घरेलु मैदानमा नै सम्भव बनाएको छ । त्यसैले यो पटक बलियो इटाली पाखा लगाउन फेरि एकपटक वेम्बलीमा ६० हजार दर्शकमाझ इंग्लिस टीमको प्रदर्शन सम्झनलायक बन्ने विश्वास प्रशिक्षक ग्यारेथ साउथगेटले गरेका छन् ।

तर प्रतियोगिताको फाइनलमा इंग्ल्यान्ड दबाबमा हुने पनि हुनेछ । किनभने पहिलोपटक युरोपियन च्याम्पियनसिपको उपाधि उठाउन उसले इटालीको चुनौती पन्छाउनुपर्नेछ, जुन सहज हुने छैन ।

यो पनि
युरो २०२० सेमिफाइनल : इटाली र इंग्ल्यान्डको किन बढी चर्चा ?

फाइनलमा पुगेको इटाली २०१८ को विश्वकप छनौटमा असफल भएको थियो । यद्यपि म्यानचेस्टर सिटीका पूर्वप्रशिक्षक रोबर्टो मान्सिनीले टीमलाई निरन्तर अपराजित राखेका छन् । उनले बेल्जियम र स्पेनजस्ता बलिया प्रतिद्वन्दीलाई पराजित गर्दै फाइनलमा स्थान बनाएको हो । ३३ खेलमा अपराजित रहँदै हार्न बिर्सिएको इटालीसँगको फाइनल जित्नुपर्ने भएकाले पनि इंग्लिस टोली दबाबमा हुने विश्लेषणहरु भइरहेका छन् ।

प्रशिक्षक ग्यारेथ साउथगेटले फाइनलका लागि टीमको तयारी सुरु गरिसकिएको बताएका छन् । टीमको ऐतिहासिक उपलब्धिका लागि खेलाडीलाई बिनादबाब मैदानमा उत्रने अवस्था सिर्जना हुनुपर्ने उनले बताए । उनले भने‚ ‘स्वभाविक रुपमा ठुलो प्रतियोगिताको फाइनलमा टीमलाई दबाब पर्छ नै‚ तर दबाबभन्दा पनि हौसला राखेर खेलाडीले मैदानमा प्रदर्शन गर्न सके त्यसले सकारात्मक नतिजा दिनेछ ।’

त्यसो त सधैं सेमिफाइनलमा अड्किने गरेको इतिहास तोडेर फाइनल पुगेसँगै स्वभाविक रुमपा इंग्ल्यान्डसँग उपाधिको अपेक्षा छ । तर ३३ खेलसम्म अपराजित रहेको टीम अजुरुलाई रोक्नु चानचुने कुरा होइन ।

यदि आइतबार हुने फाइनलमा इंग्ल्यान्डले इटालीलाई पराजित गरे १९६६ मा जितेको विश्वकपपछि उसको पहिलो ठुलो उपाधि हुनेछ । इंग्ल्यान्डले युरोपियन च्याम्पियनसिपको उपाधि भने अहिलेसम्म जित्न सकेको छैन ।

प्रशिक्षक साउथगेट यसलाई लामो समयपछिको खुसीको संज्ञा दिँदै इंग्लिस समर्थकका लागि यो क्षण कति आवश्यक थियो भनेर प्रमाणित भएको बताउँछन् । उनी भन्छन्‚ ‘सेमिफाइनलबाट फाइनल पुग्दाको खुसीलाई बाँकी केही दिनमा पूर्णता दिन प्रयास हुनेछ ।’ इंग्लिस टिमका पूर्वफरवार्ड ग्यारी लिंकरले आफ्नो जीवनमा पहिला यस्तो अनुभव नै नभएको बताएका छन् । उनले यसलाई फरक किसिमको खुसी र अनुभवको क्षण भएको बताए ।

इंग्ल्यान्डले मुख्य प्रतियोगितामा भोगेको दुःख
इंग्ल्यान्डले सन् १९६६ को विश्वकप उपाधिपछि अर्को उपाधिका लागि एकपछि अर्को मेहनत गरिरह्यो । उक्त विश्वकपपछि इंग्ल्यान्डले मुख्य प्रतियोगितामा मात्रै ३०२ खेल खेलेको छ । ५५ वर्षपछि ठूलो प्रतियोगिताको फाइनलमा पुग्दा उसले २७ हजार ५ सय ७० मिनेट मैदानमा बिताएको छ । १८० खेल जितेको इंग्लिस टिमले ६ सय ४ गोल गरेको छ भने १ सय ९६ गोल व्यहोरेको छ ।

यो पनि
घरेलु मैदानमा फर्किएको इंग्लिस टीमको सान

१९६६ यता इंग्ल्यान्ड पोर्चुगलसँग दुई पटक नकआउटमा पराजित भएको छ । २००४ र २००६ मा पोर्चुगल उसको हारको कारण बनेको छ ।

त्यस्तै जर्मनीले पनि इंग्ल्यान्डलाई मुख्य प्रतियोगितामा निरन्तर दुःख दिएको छ । २०१८ को विश्वकप र २०१९ को नेसन्स कपको सेमिफाइनलसम्म पुर्यालउन सफल प्रशिक्षक ग्यारेथ साउथगेट अब भने उपाधि उचाल्ने क्षणको नजिकै पुगेका छन् ।

इंग्ल्यान्डलाई झस्काउने ती खेल
इंग्ल्यान्डले उपलब्धि हासिल नगरेको पनि होइन । यूईएफए र फिफाले आयोजना गरेका २८ ठुला प्रतियोगितामध्ये इंग्ल्यान्डले १४ वटामा नकआउटसम्म स्थान बनाएको छ ।

१९७० को मेक्सिको विश्वकपमा गर्ड मुलरको भलिदेखि २०१० को विश्वकपमा फ्रेन्क लाम्पार्डको गोलले मान्यता नपाएकोसम्म घटना दुःखदायी रहे । १९८६ मा म्यारोडोनाको ह्यान्ड अफ गड’को शिकार पनि इंग्ल्यान्ड नै भएको थियो । त्यस्तै १९९० को विश्वकप र १९९६ को युरोमा जर्मनीसँग पेनाल्टी सुटआउटमा बाहिरिएको पीडा सबै एकमुष्ट भुलाउने अवसर बनेर यूरो २०२० आएको छ ।

दर्शक क्षमता बढाउन माग
फाइनल प्रवेशका लागि अहिलेसम्म कुल ६० हजार दर्शकलाई मैदान प्रवेशको अनुमति दिइएको छ । वेम्बलीमा दर्शक क्षमता करिब ९० हजार छ । धेरैले यो ऐतिहासिक अवसरका लागि मैदानमा दर्शक बढाउन आग्रह गरेका छन् । डेनमार्कसँगको सेमिफाइनलको टिकट सामाजिक सञ्जालमा १ हजार पाउन्डसम्ममा बिक्री भएको थियो । यूईएफएको आधिकारिक वेबसाइटले फाइनलमा सर्वसाधारणका लागि छुट्याइएको टिकट बिक्री भइसकेको जनाएको छ ।

धेरैले दुवै खोप लगाएकालाई मैदान प्रवेशका लागि अनुमति दिन र त्यसका लागि सिट संख्या बढाउन आग्रह गरेका छन् । यद्यपि आधिकारिक रुपमा यूईएफएले थप दर्शक फाइनलमा प्रवेश गराउने विषयमा कुनै निर्णय भने गरेको छैन ।