मकालु खबर दिनभर : यी हुन् आजका १० प्रमुख समाचारहरु

प्रमुख समाचारका शीर्षकहरु :
– प्रधानमन्त्रीले आह्वान गरेका संवैधानिक परिषद्को बैठक देउवाद्धारा अस्वीकार
– कांग्रेस पूर्वसांसद शाहसहित १०९ जना नेकपामा प्रवेश
– शिक्षक शिक्षिकालाई ठेक्कापट्टा र राजनीतिमा नअल्मलिन शिक्षामन्त्रीको आग्रह
– कोरोना अपडेट
– सञ्चारकर्मीलाई मन्त्री गुरुङको आग्रह–‘मुलुकको आर्थिक विकासमा सहयोग गर्नुस्’
– रोकिएन राजावादी आन्दोलन, काठमाडौंमा पुनः प्रदर्शन
– विश्वकप छनोट : नेपालले यी टीमसँग खेल्दैछ दशरथ रंगशालामा फुटवल
– आज बालाचतुर्दशी, पशुपतिमा छैन शतबीज छर्ने कार्य
– बाइडेनको जित अस्विकार गर्ने मुद्धा सर्वोच्चद्धारा खारेज

प्रधानमन्त्रीले आह्वान गरेका संवैधानिक परिषद्को बैठक देउवाद्धारा अस्वीकार

प्रधानमन्त्री केपी शर्मा ओलीले आइतबारका लागि बोलाएका संवैधानिक परिषद्को बैठकमा कांग्रेस सभापति शेरबहादुर देउवा सहभागी नहुने भएका छन् । बैठक हुन एक दिन मात्रै बाँकी छँदा सभापति देउवाले आफ्नो प्रियपात्र रमेश लेखकमार्फत् प्रधानमन्त्री ओलीलाई संवैधानिक परिषद्को बैठकमा आफू उपस्थित हुन नसक्ने सन्देश पठाएका हुन् ।

स्रोतले बताएअनुसार देउवाले आफूहरुको २९ गतेको प्रदर्शनलाई प्रभावित पार्नेगरी बैठक बोलाइएको हुनसक्ने ठहर गर्दै ओलीलाई यस्तो सन्देश पठाएका हुन् । ओलीले आइतबार बिहान ९ बजेका लागि संवैधानिक परिषद्को बैठक डाकेका छन् । देउवाले भने प्रदर्शनभन्दा अगाडि आफूले बैठकमा उपस्थिति जनाउन नसक्ने बताएका छन् ।

कानूनी व्यवस्थाअनुसार संवैधानिक परिषद्मा विपक्षी दलका नेता अनिवार्य हुनुपर्ने भनिएको छ । अहिले अख्तियार दुरुपयोग अनुसन्धान आयोगका प्रमुख आयुक्त, आयुक्तलगायत अन्य थुप्रै निकायहरु अहिले नेतृत्वबिहीन छन् । यसअघि नियुक्तिकै विषयमा ओलीले देउवासँग छलफल गरेका थिए । कांग्रेसले आगामी २९ गते देशव्यापी सरकार विरोधी आन्दोलन गर्ने घोषणा गरेको छ ।

कांग्रेस पूर्वसांसद शाहसहित १०९ जना नेकपामा प्रवेश

नेपाली कांग्रेसकी पूर्वसांसद कौसर शाहसहित १०९ जना सत्ताधारी नेकपामा प्रवेश गरेका छन् । नेकपा मुख्यालय धुम्बराहीमा शनिबार (आज) एक कार्यक्रमबीच उनीहरुले पार्टी प्रवेश गरेका हुन् ।

कार्यक्रममा कार्यकारी अध्यक्ष पुष्पकमल दाहाल ‘प्रचण्ड’ र वरिष्ठ नेता माधवकुमार नेपालले उनीहरुलाई पार्टी प्रवेश गराएका हुन् । यस्तै अध्यक्ष दाहालले कांग्रेसलाई परित्याग गरी नेकपामा प्रवेश गर्ने निर्णय गर्नु सही भएकोसमेत बताएका छन् ।

पूर्वसांसद शाह दोस्रो संविधानसभा निर्वाचन २०७० मा कांग्रेसको तर्फबाट मुस्लिम कोटामा सांसद बनेकी थिइन् । यसअघि सो कुराको जानकारी अध्यक्ष दाहालको सचिवालयले दिएको थियो ।

शिक्षक शिक्षिकालाई ठेक्कापट्टा र राजनीतिमा नअल्मलिन शिक्षामन्त्रीको आग्रह
शिक्षा, विज्ञान तथा प्रविधिमन्त्री गिरिराजमणि पोखरेलले विद्यालयका शिक्षक र प्रधानाध्यापकलाई ठेक्कापट्टा र राजनीतितिर नभई पठनपाठनको गुणस्तर सुधार्नतिर ध्यान दिन आग्रह गरेका छन् ।

मेचीनगर नगरपालिका–८ स्थित आदर्श माध्यमिक विद्यालयको नयाँ पुस्तकालय भवनको उद्घाटन गर्दै उनले शिक्षालाई प्रविधिमैत्री बनाउन शिक्षकले मेहनत गर्नुपर्ने बताए ।

झापाको नमूना विद्यालयका रुपमा चिनिएको आदर्श माविमा संघीय सरकारको रु १६ लाख र प्रदेश नम्बर १ सरकारको रु छ लाख ५० हजार गरी कूल रु २२ लाख ५० हजारका लागतमा विद्यालय परिसरमा पुस्तकालय भवन निर्माण भएको विद्यालय व्यवस्थापन समितिका अध्यक्ष रेवन्तराज पोखरेलले बताए ।

कोरोना अपडेट : थप १५ जनाको मृत्युु, ८९९ जना नयाँ संक्रमित थपिए
नेपालमा कोरोना संक्रमणबाट थप १५ जनाको निधन भएको छ । स्वास्थ्य तथा जनसंख्या मन्त्रालयले दिएको जानकारीअनुसार पछिल्लो २४ घण्टामा थप १५ जनाको मृत्यु भएसँगै नेपालमा कूल निधन हुनेको संख्या १ हजार ६ सय ८९ पुगेको छ ।

यस्तै गत २४ घण्टामा थप ८ सय ९९ जना नयाँ कोरोना संक्रमण थपिएका छन् । योसँगै नेपालमा कोरोना संक्रमितको संख्या २ लाख ४७ हजार ५ सय ९३ पुगेको छ ।

आजको सक्रिय संक्रमितको संख्या ११ हजार ६ सय ७३ रहेको मन्त्रालयले जनाएको छ । यसैबीच पछिल्लो २४ घण्टामा १ हजार ३ सय ५९ जना निको भएका छन् । योसँगै निको हुनेको संख्या २ लाख ३१ हजार २ सय पुगेको छ ।

सञ्चारकर्मीलाई मन्त्री गुरुङको आग्रह–‘मुलुकको आर्थिक विकासमा सहयोग गर्नुस्’
सञ्चार तथा सूचना प्रविधिमन्त्री पार्वत गुरुङले पत्रकारिताका माध्यमबाट मुलुकको आर्थिक विकासमा सहयोग गर्न आम सञ्चारमाध्यमसँग अपिल गरेका छन् ।

नेपाल आर्थिक पत्रकार सङ्घ (नाफिज)को पाँचौँ महासभालाई यहाँ आज समापन गर्दै उहाँले कोभिड–१९ सँगै ओरालो लागेको मुलुकको आर्थिक अवस्था उकास्ने गरी भ्रामकभन्दा पनि सत्यसथ्य समाचार प्रकाशनरप्रसारण गर्न आग्रह गरेका हुन् ।

उनले नेपाली पत्रकारिता क्षेत्र उद्ययमशील बन्नुपर्ने बताउँदै मिडियामा हरेक हिसाबले लगानीकर्ता बलियो हँदै जाने र श्रमजीवी पत्रकार कमजोर हुँदै जाने प्रवृत्तिको अन्त्य हुनुपर्नेमा जोड दिए ।

रोकिएन राजावादी आन्दोलन, काठमाडौंमा पुनः प्रदर्शन

पछिल्लो समय राजावादी आन्दोलनहरु चकिँदै गइरहेका छन् । यसैबीच शनिबार काठमाडौंमा पनि प्रदर्शन भएको छ ।

ललितपुरमा राष्ट्रवादी देशभक्त समाजको आयोजनामा प्रदर्शन भएको हो । सातदोबाटोबाट शुरु भएको मोटरसाइकल र्याली पाटन दरबार क्षेत्र परिक्रमा गरी ललितपुर महानगरपालिका रहेको क्षेत्र पुगेर कोणसभामा परिणत भएको थियो ।

सहभागीहरुले राजसंस्था र हिन्दू राज्यको पक्ष तथा संघीयता र गणतन्त्रको विरोधमा नारा लेखिएका पम्पलेट बोकेका थिए ।
यसअघि प्रधानमन्त्री केपी शर्मा ओलीले सर्वदलीय बैठक बोलाएर राजावादी चलखेलविरुद्ध एक हुन आह्वान गरेका थिए ।
यता राजावादी दल राष्ट्रिय प्रजातन्त्र पार्टी (राप्रपा)ले भने आन्दोलनलाई समर्थन गर्दै आइरहेको छ ।

खेताला खोजेर विरोध गर्न थालियो : गोकुल बाँस्कोटा

पार्टीभित्र विवाद र एक-अर्काको पक्ष(विपक्षमा विरोध चलिरहँदा पूर्वमन्त्री गोकुलप्रसाद बाँस्कोटाले सत्तारूढ नेकपा भित्रैका नेताले अर्का पार्टीका ‘खेताला’ खोजेर विरोधमा लगाउने काम शुरु भएको बताएका छन् ।

बनेपा नगरपालिका–३ स्थित नेकपाका जिल्ला नेता स्व. प्रेमप्रसाद सिग्देलको श्रद्धाञ्जलीसभालाई आज सम्बोधन गर्दै उनले यस्तो बताएका हुन् । आफ्नै पार्टीका नेताद्वारा विरोधमा लगाइएको प्रमाण फेला परेको समेत उनले दाबी गरेका छन् । आफूहरु जोखिममा जान नचाहेकाले व्यक्तिगत लाभहानीमा पार्टी विभाजन गर्न नहुने उनको तर्क थियो ।

पछिल्लो समय नेकपाका अध्यक्षद्वय केपी शर्मा ओली र पुष्पकमल दाहाल प्रचण्डबीचको विवाद साम्य हुन सकिरहेको छैन । दोस्रो पुस्ताका नेताहरू पार्टी विवाद मिलाउन सक्रिय रूपमा लागेपनि दुई अध्यक्षबीच तिक्तता कायमै रहँदा पार्टी फुट्न सक्ने किसिमका आँकलन समेत भइरहेको छन् ।

विश्वकप छनोट : नेपालले यी टीमसँग खेल्दैछ दशरथ रंगशालामा फुटवल
कतारमा हुने फिफा विश्वकप २०२२ को छनोट चरण अन्तर्गत समूह चरणको बाँकी खेलको खेल तालिका सार्वजनिक भएको छ । एसियाली फुटबल महासंघ (एएफसी) ले नेपाल सहित एसियाली देशको खेल तालिका सार्जजनिक गरेको हो ।

सन् २०२० मार्चमा हुने तय भएको खेल कोरोना भाइरस संक्रमणका कारण अक्टोबर–नोभेम्बरलाई सारिएको भएपनि स्थिति सुधार नहुँदा एएफसीले खेल स्थगित गरेको थियो । अब नेपालले बाँकी खेल मार्च र जुन महिनामा खेल्ने भएको छ । छनोट अन्तर्गत ५ खेलमा १ जित र ४ हार बेहोरेको नेपालले ३ खेल खेल्न बाँकी छ । अब यी तीन खेलहरु काठमाडौंको दशरथ रंगशालामा हुनेछ ।

एएफसीले नेपाल र चाइनिज ताइपेइको खेल २५ मार्च २०२१ (चैत्र १२ २०७७) को लागि तोकेको छ । नेपालले ३० मार्चमा (चैत्र १७) अष्ट्रेलियासँग खेल्नेछ भने अन्तिम खेलमा नेपालले जोर्डनको सामना गर्नेछ । उक्त खेल ७ जुन २०२१ मा (२४ जेठ २०७८) हुने एएफसीले जनाएको छ ।

आज बालाचतुर्दशी, पशुपतिमा छैन शतबीज छर्ने कार्य
आज बालाचतुर्दशी पर्व मनाइँदैछ । प्रत्येक वर्ष मार्गशीर्षकृष्ण त्रयोदशीका दिन बेलुकी दिवङ्गत पितृका नाममा दीपदान र चतुर्दशीका दिन बिहान शतबीज छरी मनाइने बालाचतुर्दशी पर्व आज बेलुकी हुँदैछ ।

पशुपतिनाथ मन्दिरलगायत देशभरका शिवमन्दिरमा बालाचतुर्दशीको अघिल्लो रात आज दिवङ्गत पितृका नाममा दीपदान गर्न लाखौँ भक्तजन आउने गरेकामा यसवर्ष पशुपतिनाथमा भने मेला नलाग्ने पशुपति क्षेत्र विकास कोषले जनाएको छ । बाला चतुर्दशीमा लाखौँ भक्तजन पशुपतिमा आउने गरेकाले कोरोना फैलने डरले यसवर्ष दीपदान नगर्न अनुरोध गरिएको कोषका कोषाध्यक्ष डा. मिलनकुमार थापाले बताए ।

आज दीपदान गरी आइतबार बिहानै पितृको सम्झनामा शतबीज छरी बालाचतुर्दशी पर्व मनाइन्छ । प्रत्येक वर्ष मार्गशीर्ष कृष्ण चतुर्दशीका दिन बालाचतुर्दशी पर्व मनाउन देशका विभिन्न स्थानबाट भक्तजन पशुपतिमा आउने गरेकामा यस वर्ष मेला नलाग्ने भएपछि श्रद्धालुले नजिकैको शिवालयमा दीपदान गर्ने भएका छन् । आफ्नो परिवारभित्रका दिवङ्गत आत्माको चिरशान्तिको कामना गर्दै १०८ शिवलिङ्ग, कैलाश, सूर्यघाट, गौरीघाट, आर्यघाट, गुह्येश्वरी, पशुपति, मृगस्थली, विश्वरूप र किराँतेश्वर आदि ठाउँमा शतबीज छर्ने गरिन्छ ।

बाइडेनको जित अस्विकार गर्ने मुद्धा सर्वोच्चद्धारा खारेज
 अमेरिकाका राष्ट्रपति डोनाल्ड ट्रम्पले राष्ट्रपतिय निर्वाचनको मत परिणामलाई अस्विकार गर्दै दायर गरेको मुद्धा खारेज भएको छ । अमेरिकाको सर्वोच्च अदालतले मुद्धाहरुमा पर्याप्त प्रमाण र आधारहरु नभएको भन्दै शुक्रबार ती मुद्धाहरु खारेज गरिदिएको हो ।

प्रमुख चार प्रतिस्पर्धात्मक राज्यहरूको चुनावी नतिजा खारेज गर्न उनले गरेको मागलाई अदालतले अस्विकार गरिदिएको छ । जर्जिया, मिशिगन, पेन्सिल्भानिया र विस्कन्सिन राज्यको नतिजालाई अमान्य घोषणा गर्न यसै साता मुद्दा दायर गरिएको थियो ।

अदालतको यो आदेशले राष्ट्रपति ट्रम्पलाई फेरी अर्को धक्का दिएको छ । उनले गत नोभेम्बर ३ तारिखका दिन भएको निर्वाचनमा धाँधली भएको दाबी गर्दै आएका छन् । त्यसप्रति असन्तुष्टि जनाउदै उनले विभिन्न राज्यका अदालतहरुमा मुद्धा दायर गरेका थिए । ती अदालतहरुले पनि ट्रम्पको मागलाई अस्विकार गर्दै आएकोमा सर्वोच्च अदालतले पनि त्यसैसँग मिल्ने निर्णय गरेको हो ।

प्रतिश्पर्धी जो बाइडेनले निर्वाचनमा जित हासिल गर्ने संकेत देखिए लगत्तै उनले नतिजा अस्विकार गर्ने संकेत गरेका थिए । सबै अदालतहरुले उनको मागलाई अस्विकार गरेपछि पद हस्तान्तरण गर्नुको विकल्प उनीसँग छैन । उनले आगमी जनवरी २० तारिखका दिन राष्ट्रपतिमा नवनिर्वाचित वाइडेनलाई पद हस्तान्तरण गर्नु पर्नेछ ।