चितवनमा आइतबारदेखि चरा गणना,सौराहामा औपचारिक उद्घाटन

ध्रूव राज खनाल

चितवन । चितवन राष्ट्रिय निकुञ्ज र आसपासका क्षेत्रमा आइतबारबाट चरा गणना सुरु गरिदै छ ।

बर्ड एजुकेशन सोसाइटी चितवनको आयोजनामा चितवन राष्ट्रिय निकुञ्ज र यस आसपासका नदी, तालतलैया तथा सिमसार क्षेत्रलगायत विभिन्न ठाउँमा चरा गणना गरिने छ । सोसाइटीले सौराहामा शुक्रवार एक कार्यक्रमको आयोजना गरी गणनाको औपचारिक उद्घाटन गर्दै संरक्षणकर्मीहरुसंग अन्तक्रिया समेत गरेको छ ।

चरा रहेका क्षेत्रलाई विभिन्न भागमा बाँडेर गणना गरिँदै छ । कसरादेखि लोथरसम्म एउटा क्षेत्र हुनेछ । लोथरदेखि जिन्दगानी घाटसम्म, जिन्दगानी घाटदेखि सौराहासम्म र सौराहादेखि कसरा पुलसम्म तीन भाग बनाएर डुङ्गाबाट गणना गरिने सोसाइटीका उपाध्यक्ष लोजिककृष्ण श्रेष्ठले जानकारी दिए ।

निकुञ्जभित्रको लामिताल, तमोरताल, गरुढताल, बिसहजारी तालमा गणना गरिँदै छ ।

बिसहजारी तालभित्रका बाटुली पोखरी, टिकौली ताल, कुमाल ताल र राइनो तालमा गणना गरिने उनले जानकारी दिए । बूढी राप्ती, ढुङ्ग्रे खोला, भण्डाको मत्स्यपालन केन्द्रमा पनि गणना गरिने छ । छ दिनभित्र गणना सम्पन्न गर्ने गरी तयारी गरिएको छ । गतसाल जिल्लामा ६४१ प्रजातिका चरा फेला परेका थिए । तीमध्ये ५७ जल प्रजातिका थिए । देशभरमा यो सङ्ख्या ८८७ रहेको छ । चरा गणनाका लागि सौराहा क्षेत्रका विभिन्न सङ्घ संस्थासँग सहयोग जुटाइएको छ ।

गणना कार्यमा क्यामेरा, वाइनोकुलर र टेलिस्कोपलगायतका उपकरण प्रयोग गरिने सोसाइटीका पूर्व अध्यक्ष बासु विडारीले जानकारी दिए । चराको रङ, शरीरको बनोट, आवाज हेरेर र सुनेर गणना गरिने उनको भनाई छ । चरासंरक्षणकर्मीहरु बद्री चौधरी,टीका गिरी,बासु विडारी,रमेश चौधरी,दिनेश गिरी,टेकबहादुर गुरुङको नेतृत्वमा चितवन निकुञ्ज र यस आसपासको मध्यवर्ती क्षेत्रमा पानी चराको गणना हुने छ ।

निकुञ्जका पूर्वी सेक्टर प्रमुख प्रकास उप्रेती प्रमुख अतिथि रहेको सो कार्यक्रममा राष्ट्रिय प्रकृति संरक्षण कोष सौराहाका प्रमुख डा।बाबुराम लामिछाने,मृगकुञ्ज उपभोक्ता समितिका सचिव सागर मिश्र,वडा सदस्य किरण महतो,बाघमारा मध्यवर्ती सामुदायिक वनका अध्यक्ष जीतु तामाङ,रेवान सौराहाका अध्यक्ष दीपेन्द्र खतिवडा लगायतले मन्तव्य राखेका थिए । कार्यक्रम सोसाइटीका अध्यक्ष रमेश चौधरीको अध्यक्षतामा भएको थियो ।

चितवनमा दुई जना कोरोना संक्रमितको मृत्यु

चितवन। चितवनको भरतपुर अस्पतालमा दुई जना कोरोना संक्रमितको उपचारको क्रममा मृत्यु भएको छ । डेढ घन्टाको फरकमा दुई जना संक्रमितको मृत्यु भएको हो ।

भरतपुर अस्पतालका सूचना अधिकारी लिलाधर पौडेलका अनुसार भरतपुर महानगरपालिका–१० बस्ने ७९ वर्षीय पुरुष र धादिङको निलकण्ठ नगरपालिका–३ बस्ने ६१ वर्षीया महिलाको मृत्यु भएको हो ।

भरतपुर १० बस्ने ७९ वर्षीय पुरुषमा यही कात्तिक १३ गते कोरोना संक्रमण पुष्टि भएको थियो । श्वासप्रश्वासमा समस्या भएपछि उनलाई आइतबार अस्पतालमा भर्ना गरिएको थियो ।

स्वास्थ्य जटिल बन्दै गएपछि उनलाई सोही दिन कोभिड आईसीयूमा राखेर उपचार सुरु गरिएकोमा आइतबार राति १ः२० बजे उनको मृत्यु भएको सूचना अधिकारी पौडेलले बताए ।

यसैगरी भरतपुर अस्पतालमै उपचाररत धादिङको निलकण्ठ नगरपालिका–३ बस्ने ६१ वर्षीया महिलाको सोमबार बिहान २ः५५ बजे मृत्यु भएको छ । श्वासप्रश्वासमा समस्या भएपछि यही कात्तिक ५ गते उनी अस्पतालको आइसोलेसनमा भर्ना भएकी थिइन् । उनलाई सोही दिन कोरोना संक्रमण पुष्टि भएको थियो ।

चितवनमा सवारी दुर्घटना, छोराको मृत्यु बाबू घाइते

चितवन। चितवनको भरतपुरमा ग्यास बुलेट र मोटरसाइकल ठक्कर खांदा एक जनाको मृत्यु भएको छ भने अर्का एक जना घाइते भएका छन् ।

भरतपुर मिलनचोकमा पुर्वबाट जाँदै एनएल ०१ एबि ९२३५ नम्बरको ग्यास बुलेटमा सोही दिशा तर्फ जाँदै गरेको ना ४२प ९७१५ नम्बरको मोटरसाईकल ठोक्किएर दुर्घटना भएको हो ।

दुर्घटनामा राप्ती नगरपालिका– ५ का २४ बर्सिय मनोज सुनारको मृत्यु भएको र ४८ वर्षीय खडक बहादुर सुनार घाईते भएका छन् । प्रहरिका अनुसार उनिहरु बुवा छोरा हुन् ।

दुर्घटनामा गम्भीर घाइते भएका मनोजलाई अस्पताल लैजाँदै गर्दा बाटोमा मृत्यु भएको हो । घाइते भएका खड्कको नयाँ मेडिकल कलेज भरतपुरमा उपचारको भइरहेको जिल्ला प्रहरी कार्यलय चितवनले जनाएको छ । दुबै सवारी साधन र ग्यास बुलेट चालक गैडाकोट नगरपालिका – १ का ४२ वर्षीय राजु कुमार थापा लाई नियन्त्रणमा लिएको प्रहरीले जनाएको छ ।

चितवनमा कोरोना संक्रमित महिलाको मृत्यु

कार्तिक १० गते । चितवनमा सोमबार एक जना कोरोना संक्रमित महिलाको मृत्यु भएको छ । चितवन मेडिकल कलेजमा उपचारका क्रममा दिउँसो महिलाको मृत्यु भएको हो । चितवन मेडिकल कलेजका निर्देशक डाक्टर दयाराम लम्सालका अनुसार भरतपुर १० कि ६७ बर्सिया महिलाको मृत्यु भएको हो ।

कात्तिक ५ गते ज्वरो,स्वासप्रस्वासमा समस्या भइ अस्पताल भर्ना भएकी ती महिलामा ६ गते कोरोना संज्रमण पुष्टि भएको थियो । उच्च रक्तचाप र मधुमेहबाट पिडित समेत रहेकी ती महिलाको दिउँसो १:४३ बजे मृत्यु भएको डाक्टर लम्सालले बताए ।

आइतबार राती भरतपुर १ निवासी ७७ बर्सिय पुरुषको मृत्यु भएको थियो । ती पुरुषको चितवन मेडिकल कलेजमा उपचार भइरहेको थियो ।

उपचारका क्रममा आइतबारराती १२:२९ बजे मृत्यु भएको चितवन मेडिकल कलेजका निर्देशक डाक्टर दयाराम लम्सालले जानकारी दिए । कात्तिक २ गते कोरोना संक्रमण पुष्टि भएका ती पुरुष होम आइसोलेसनमा बस्दै आएका थिए ।