५० डिग्रीको प्रचण्ड गर्मीका बीच इराकमा टमाटर भित्र्याउने चटारो

एजेन्सी । इराकको राजधानी बग्दादको उत्तरी क्षेत्रमा अवस्थित कृषि भूमिहरूमा यतिबेला टमाटरको फसल भित्र्याउने काम तीव्र गतिमा भइरहेको छ ।

प्रचण्ड गर्मी र चर्को घामको प्रवाह नगरी स्थानीय किसान व्यावसायिक बाली संकलनमा व्यस्त देखिएका छन् । इराकी खानपानको अनिवार्य हिस्सा मानिने टमाटर भित्र्याउने यो समय मौसमी दृष्टिकोणले निकै चुनौतीपूर्ण मानिन्छ ।

झन्डै ५० डिग्री सेल्सियसको हाराहारीमा पुग्ने अत्यधिक तापक्रम र तातो हावाका बीच कामदारहरूले कडा श्रम गरिरहेका छन् । इराकमा टमाटरलाई वर्षभरि नै आवश्यक पर्ने आधारभूत तरकारीको रूपमा लिइन्छ।

त्यहाँका प्रायः सबै परम्परागत परिकारहरू, विशेषगरी स्ट्यु र दैनिक सलादका लागि यो मुख्य सामग्री हो । इराकी जनजीवन र भोजनको अभिन्न अङ्ग भएकाले पनि प्रतिकुल मौसमका बाबजुद यसको उत्पादन र संकलनलाई प्राथमिकता दिने गरिएको छ ।