अङ्कारास्थित शरणार्थी तथा आप्रवासन अनुसन्धान केन्द्रका प्रमुख मेटिन कोराबातिरकाअनुसार यो कानुनी सहजताले शरणार्थी र टर्की दुवैलाई फाइदा पुग्नेछ । यसले अनौपचारिक रोजगारी घटाउन र श्रमको स्तर सुधार्न मद्दत गर्ने उनको विश्लेषण छ । यद्यपि, कोराबातिरले स्वदेश फिर्तीको मुख्य आधार सिरियाको आन्तरिक अवस्था नै रहने बताएका छन् ।

लाखौँ सिरियालीहरू फर्कन थालेसँगै टर्कीका गाजियान्टेप र किलिसजस्ता सीमावर्ती प्रान्तहरूको स्थानीय अर्थतन्त्रमा प्रभाव देखिन थालेको छ । यी क्षेत्रमा सिरियालीहरू श्रम शक्ति र उपभोक्ता बजार दुवैको अनिवार्य हिस्सा बनेका थिए ।

विज्ञहरूकाअनुसार १३ वर्षभन्दा लामो विस्थापनपछि पुनः जीवन स्थापित गर्नु रातारात सम्भव छैन । त्यसैले, धेरै सिरियालीहरूले अहिले नै स्वदेश फर्किने हतार नगरी वस्तुस्थितिको सूक्ष्म मूल्याङ्कन गरिरहेका छन् ।