ट्राफिक नियम मिच्नेको लाइसेन्स खारेज गर्छौँ: प्रमुख अधिकारी

काठमाडौँ । काठमाडौँ उपत्यका ट्राफिक प्रहरी कार्यालयका प्रमुख प्रहरी वरिष्ठ उपरीक्षक (एसएसपी) नवराज अधिकारीले सडक अनुशासन उल्लङ्घन गर्ने र लापरबाहीपूर्ण तरिकाले सवारी चलाउने चालकहरूको सवारी चालक अनुमति पत्र (लाइसेन्स) खारेज गर्ने प्रक्रिया सुरु गरिएको बताएका छन् ।

यातायात व्यवसायी र मजदुर संगठनका प्रतिनिधिहरूसँगको अन्तरक्रियामा बोल्दै एसएसपी अधिकारीले पटक–पटक नियम उल्लङ्घन गर्ने र जरिवाना तिर्न समेत नआउने चालकहरूलाई अब नछोडिने स्पष्ट पारे ।

एसएसपी अधिकारीले ट्राफिक प्रहरीको पहिलो मिसन नै व्यवहारमा परिवर्तन ल्याउनु रहेको बताए । उनले प्रहरी पनि समाजकै हिस्सा भएको स्वीकार गर्दै कमी–कमजोरी भए सुधार्दै लैजाने प्रतिज्ञा समेत गरे । उनले राजश्व खातामा गएको रकम ट्राफिक प्रहरीले मिनाहा गर्न नसक्ने भन्दै यसमा स्पष्ट हुन आग्रह गरे ।

सार्वजनिक यातायातमा १० प्रतिशत खराब आचरण भएका मजदुरका कारण ९० प्रतिशत राम्रा मजदुरहरू बदनाम भइरहेको एसएसपी अधिकारीको भनाइ छ ।

उनले भने ‘यदि कुनै ट्राफिक प्रहरीले अपारदर्शी ढंगले काम गर्छ वा नराम्रो व्यवहार गर्छ भने मलाई सिधै जानकारी दिनुस्, हामी तत्काल एक्सन लिन्छौँ । कसैलाई पनि पेसागत मर्यादा बाहिर गएर व्यवहार गर्ने छुट छैन । शरीरभरि मुन्द्रा लगाउने, कपाल ठाडो पार्ने र अभद्र पोसाक लगाउने चालक–सहचालकका कारण यात्रुहरू डराउने अवस्था छ । आफ्नो चालक र सहचालकको हुलिया र गेट–अप चेन्ज गर्नुस् । हामी उनीहरूलाई तालिम दिन तयार छौँ ।’

यातायात क्षेत्रमा रहेको ‘ठेक्का प्रणाली’ (दिनको निश्चित रकम बुझाउनुपर्ने नियम) का कारण चालकहरूले तीव्र गतिमा गाडी कुदाउने र लुछाचुँडी गर्ने गरेको उहाँले औँल्याए । यसको सट्टा ई–टिकटिङ र अनलाइन सिस्टममा जान व्यवसायीहरूलाई उनले आग्रह गरे ।

बिहानै स्कुल बस र सार्वजनिक सवारीका चालकहरू मादक पदार्थ ९मापसे० र लागु पदार्थ ९लापसे० सेवन गरेर चलाइरहेको भेटिएको भन्दै ट्राफिक प्रहरी यसमा निकै कठोर हुने उनले बताए ।