सरकारले १०० दिनमा पनि रोजगारी सिर्जनाको कार्ययोजना ल्याएन: खुश्बु ओली

काठमाडौँ । प्रतिपक्ष दल राष्ट्रिय प्रजातन्त्र पार्टी (राप्रपा) की प्रमुख सचेतक खुश्बु ओलीले सरकारले हालसम्म पनि रोजगारी अवसर सृजना गर्ने कार्ययोजना समेत प्रस्तुत गर्न नसकेको दाबी गरेकी छन् ।

शुक्रवार प्रतिनिधि सभा बैठकमा समय लिएर बोल्दै उनले उक्त कुरा बताएकी हुन् ।

प्रमुख सचेतक ओलीले देशमा रोजगारीको अवसर सृजना गर्ने भन्ने बाँचाका साथ बनेको सरकारले सोही कार्य गर्नका लागि हालसम्म पनि कार्ययोजना नै ल्याउन नसक्ने विडम्बनापूर्ण भएको पनि बताइन् ।

उनले वर्तमान सरकारले युवाहरूलाई देशमा बसेर केही गर्ने वातावरण समेत बनाउन नसकेको गुनासो गरिन् । गणेश नेपाली मृत्यु प्रकरणलाई उद्धृत गर्दै प्रमुख सचेतक ओलीले वर्तमान सरकारले युवाहरूलाई पनि देश भित्रै केही गर्न सकिन्छ भन्नेकुरामा आशा जगाउन नसकेको बताइन् ।

उनले भनिन् ‘निर्वाचन अघि सत्ता पक्षले नेपाली युवालाई आफ्नै देशमा रोजगारी सृजना गर्ने ठुलो बाचा गरेको थियो । तर सरकार गठन भएको सय दिन बितिसक्दा सय जना युवा पनि रोजगारीको आशामा विदेशबाट फर्किएको देखिँदैन । किनभने सरकारले रोजगारी सृजना गर्ने कार्य योजना आजसम्म प्रस्तुत गर्न सकेको छैन । प्रश्न रोजगारी सृजनाको संख्याको मात्रै होइन, नेपालमा नै बस्न सकिन्छ भन्ने भावना सरकारले जगायो कि जगाएन ? भन्ने हो । हिजो भर्खरै एक जना युवाले राहदानी विभाग अगाडि आफैले आगो लगाएको घटना हामीमाझ ताजा छ । ती युवाले देशमा आफूले गरिखाने आशा देखेर आगो लगाए कि गरिखाने आशा नदेखेर ? मैले प्रश्न मैले सत्ता पक्षका सम्पूर्ण राख्न चाहेँ । प्रधानमन्त्री, मन्त्री, सबै सत्तापक्षका सांसदहरूलाई पनि मेरो यो प्रश्न हो । रोजगारी सृजना गर्ने निजी क्षेत्र नै आज सबैभन्दा बढी निराश हुन पुगेको छ ।’

प्रमुख सचेतक ओलीले सरकारको कारण रोजगारीको अवसर सृजना गर्ने निजी क्षेत्र समेत निराश अवस्थामा पुगेको जिकिर समेत गरिन् ।