कांग्रेसका जनप्रतिनिधिलाई आजै क्रियाशील सदस्यता अद्यावधिक गर्न निर्देशन

काठमाडौं । नेपाली कांग्रेसले पार्टीबाट निर्वाचित जनप्रतिनिधिहरूलाई आज मध्यरातसम्म क्रियाशील सदस्यता अद्यावधिक गर्न निर्देशन दिएको छ ।

निर्धारित समयभित्र सदस्यता अद्यावधिक नगर्ने जनप्रतिनिधिहरूले आगामी असोजमा हुने पार्टीको १५औँ महाधिवेशनमा सहभागी हुन नपाउने कांग्रेसले जनाएको छ ।

महामन्त्री प्रदीप पौडेल संयोजक रहेको क्रियाशील सदस्यता व्यवस्थापन समितिले सूचना जारी गर्दै संघीय संसद्का सदस्य, प्रदेशका मुख्यमन्त्री, मन्त्री, प्रदेशसभा सदस्य तथा स्थानीय तहका जनप्रतिनिधिलाई जेठ २७ गतेभित्र अनिवार्य रूपमा क्रियाशील सदस्यता अद्यावधिक गर्न आग्रह गरेको हो ।

समितिले पार्टीका केन्द्रीय पदाधिकारी तथा सदस्य, प्रदेश कार्यसमितिका पदाधिकारी र सदस्य, जिल्ला, प्रदेशसभा क्षेत्र, पालिका तथा वडा समितिका पदाधिकारी र सदस्यलाई पनि आजै मध्यरातसम्म सदस्यता अद्यावधिक गरिसक्न निर्देशन दिएको छ ।

त्यस्तै, भ्रातृ तथा शुभेच्छुक संस्थाका पदाधिकारीहरूलाई पनि तोकिएको समयभित्र सदस्यता अद्यावधिक गर्न भनिएको छ ।

कांग्रेसले जेठ १ गतेदेखि क्रियाशील सदस्यता अद्यावधिक अभियान सञ्चालन गर्दै आएको छ । पार्टीका अनुसार सामान्य क्रियाशील सदस्यहरूले भने भोलि मध्यरातसम्म पनि सदस्यता अद्यावधिक गर्न सक्नेछन् ।

गत पुस मसान्तसम्म नवीकरण वा नयाँ क्रियाशील सदस्यता लिएका सदस्यहरूबाट थप विवरण संकलन गर्ने उद्देश्यले अद्यावधिक प्रक्रिया अघि बढाइएको कांग्रेसले जनाएको छ ।