विधायन व्यवस्थापन समितिको सभापतिमा काँग्रेस सांसद रोकाय

काठमाडौँ । राष्ट्रिय सभा अन्तर्गतको विधायन व्यवस्थापन समिति सभापतिमा कृष्णबहादुर रोकाय निर्विरोध निर्वाचित भएका छन् ।

मंगलवार सिंहदरबारमा बसेको समितिको बैठकले नेपाली काँग्रेसका सांसद रोकायालाई सभापतिमा चयन गरेको हो ।

बैठक समितिका ज्येष्ठ सदस्य सभापति कृष्णप्रसाद सिटौलाको सभापतित्वमा बसेको थियो । सभापति सिटौलाले बैठकमा कृष्णबहादुर रोकायलाई समितिको सभापति चयन गर्ने प्रस्ताव पेस गरेकोमा उक्त प्रस्ताव सर्वसम्मतिले पारित भएको हो ।

समिति सभापतिमा सर्वसम्मत भएपनि रोकायाले कसैप्रति कुनैपनि प्रकारको आग्रह नराखी पार्टीभन्दा माथि उठेर समिति र सभाको गरिमालाई बढाउनेगरी भूमिका निर्वाह गर्ने प्रतिबद्धता व्यक्त गरे ।

उनले भने ‘मैले आफ्नो यो कार्यकालमा जसरी विश्वास गरेर माननीयज्युहरुले पठाउनुभएको छ । समितिको कार्यकालभरि म कसैप्रति पनि कुनै प्रकारको आग्रह नराखीकन पार्टीभन्दा माथि उठेर यो विधायन समितिलाई अझ गरिमामय बनाउने, राष्ट्रिय सभाको गरिमालाई बचाउने तथा निष्पक्ष भूमिका मेरो तर्फबाट हुनेछ ।’

समितिले चयन भएर आएका नयाँ सांसदहरूलाई समेत स्वागत गरेको छ ।