भियतनामकी उपराष्ट्रपति सुआनको नेपाल भ्रमण: आज उच्चस्तरीय वार्ता र संयुक्त पत्रकार सम्मेलन
मकालु खबर
काठमाडौं । भियतनामकी उपराष्ट्रपति भो थी आन्ह सुआनले नेपालको तीनदिने औपचारिक भ्रमणको दोस्रो दिन आज उच्चस्तरीय भेटवार्ता र संयुक्त पत्रकार सम्मेलन गर्दैछन् । बिहान ११:०० बजे काठमाडौंको होटल याक एण्ड यतिमा उपराष्ट्रपति सुआन र नेपालका उपराष्ट्रपति यादवबीच संयुक्त पत्रकार सम्मेलन हुने भएको छ ।
यसअघि दुवै उपराष्ट्रपतिहरूले प्रतिनिधिमण्डलस्तरीय द्विपक्षीय वार्ता गर्नेछन् । वार्तामा व्यापार, लगानी, जलविद्युत, र सांस्कृतिक सहकार्यका विषयमा छलफल हुने कार्यतालिका छ । नेपालका उपराष्ट्रपति रामसहाय प्रसाद यादवको निमन्त्रणामा शनिबार काठमाडौं आइपुगेकी सुआनको यो भ्रमण नेपाल-भियतनाम कूटनीतिक सम्बन्धको ५० औं वार्षिकोत्सवको अवसरमा भएको छ । यो भियतनामबाट नेपालको पहिलो उच्चस्तरीय भ्रमण हो ।
सुआनले आजै प्रधानमन्त्री केपी शर्मा ओलीसँग बालुवाटारमा शिष्टाचार भेट गर्ने कार्यक्रम छ । नेपाल र भियतनामबीच १९७५ मा कूटनीतिक सम्बन्ध स्थापना भएको थियो । हाल दुई देशबीचको वार्षिक व्यापार १०० मिलियन डलरभन्दा कम छ, तर तनहुँ जलविद्युत आयोजनामा भियतनामको सङ दा कर्पोरेसन र नेपालको कालिका समूहको साझेदारीले जलविद्युत क्षेत्रमा सहकार्यको सम्भावना देखाएको छ । यो भ्रमणले व्यापार र लगानी वृद्धिमा महत्त्वपूर्ण योगदान पुर्याउने अपेक्षा छ ।
शनिबार त्रिभुवन अन्तर्राष्ट्रिय विमानस्थलमा आइपुग्दा सुआनलाई परराष्ट्रमन्त्री डा. अर्जु राणा देउवाले स्वागत गरेकी थिइन् । देउवासँगको भेटमा नेपाल-भियतनाम सम्बन्ध सुदृढीकरण र आर्थिक साझेदारीका विषयमा छलफल भएको थियो । नेपाल आर्मीले सुआनलाई गार्ड अफ अनर प्रदान गरेको थियो । भोलि सोमबार सुआनले राष्ट्रपति रामचन्द्र पौडेलसँग शिष्टाचार भेट गर्नुहुनेछ र काठमाडौं तथा ललितपुरका ऐतिहासिक स्थलहरूको भ्रमण गर्ने कार्यतालिका छ ।
मकालु खबर
