बारामा प्रिन्सिपलमाथि गोली प्रहार, टाउको र घाँटीमा लाग्यो गोली

काठमाडौँ । बारामा मोटरसाइकल चढेर आएका व्यक्तिहरूले एक जना शिक्षकमाथि गोली प्रहार गरेका छन् ।

बाराको कलैया उपमहानगरपालिका वडा नम्बर ६ मदरसा टोलमा बाल एकता बोर्डिङ स्कुलका प्रिन्सिपल रूपेश स्वर्णकारमाथि सोमबार दिउँसो करिब सवा १ बजेतिर गोली प्रहार गरेका हुन्।

नेपाल प्रहरीका केन्द्रीय प्रवक्ता डिआइजी कुवेर कडायतका अनुसार उनको टाउको र घाँटीमा गोली लागेको छ ।

गोली लागेर घाइते भएका स्वर्णकारलाई कलैया प्रादेशिक अस्पतालमा उपचार गराएर थप उपचारका लागि वीरगञ्ज लगिएको उनले बताए ।

दुइटा मोटरसाइकलमा आएका चार जनाको समूहले स्वर्णकारमाथि गोली प्रहार गरेका थिए। गोली चलाउने समूहको खोजी भइरहेको प्रहरीले जनाएको छ।