अमेरिकी सैनिक काठमाडौँ आउँदै
काठमाडौँ । संयुक्त राज्य अमेरिकाको सैनिक टुकडी बिहीबार काठमाडौं आउने भएको छ ।
१२ जना सैनिकको एक टुकडी अमेरिकी वायु सेनाको विमानमा काठमाडौं आउन लागेको हो । उनीहरू बन्दोबस्तीका सामग्रीसहित त्रिभुवन अन्तर्राष्ट्रिय विमानस्थलमा अवतरण हुने नेपाली सेनाका प्रवक्ता सहायक रथी कृष्ण प्रसाद भण्डारीले जानकारी दिए ।
नेपाली सेनाले संयुक्त राज्य अमेरिकाको सेनासँग संयुक्त सैन्य अभ्यास गर्न लागेको हो ।
दुई देशका सेनाबीच नियमित रूपमा सञ्चालन हुँदै आएको ज्वाइन्ट कम्बाइण्ड एक्सचेन्ज ट्रेनिङ (जेसीईटी) ब्यालेन्स नेलको चालिसौं संस्करणमा सहभागी हुन टोली काठमाडौं आउन लागेको हो ।
यो अभ्यास भदौ २४ गतेदेखि असोज १२ गतेसम्म काठमाडौं उपत्यकामा सञ्चालन हुने छ ।
नेपाली सेनाका ३० जना तथा अमेरिकी सेनाका १२ जना गरी जम्मा ४२ जना संयुक्त अभ्यासमा सहभागी हुने छन् । जसमा विपद् व्यवस्थापन, खोज तथा उद्धार, मानवीय सहायतालगायतका विषयहरूमा अनुभव तथा ज्ञान आदानप्रदान हुनेछ ।
नेपाली सेना संयुक्त राज्य अमेरिका, बेलायत, भारत, चीन, श्रीलङ्का, मङ्गोलिया, बङ्गलादेश, इजरायललगायत देशहरूका सैन्य सङ्गठनहरूसँग खोज तथा उद्धार, विपद् व्यवस्थापन, प्रतिआतंकवाद, पर्वतारोहण, संयुक्त राष्ट्रसङ्घीय शान्ति सेनामा सहभागी रहँदा निर्वाह गर्नुपर्ने भूमिकाहरूलगायतका विषयमा संयुक्त तालिम तथा अभ्यासहरूमा सहभागी हुँदै आएको छ ।
भदौ २४ गतेदेखि हुने अभ्यास असोज १२ गतेसम्म सञ्चालन हुनेछ ।
यसैबीच, संयुक्त अधिराज्यमा सञ्चालन हुने प्रतिस्पर्धात्मक एक्सरसाइज क्याम्ब्रेयिन पट्रेलमा सहभागी हुने नेपाली सेनाको १० सदस्यीय टोली बुधवार प्रमुख सेनानी विवेकविक्रम शाहको कमाण्डमा बेलायततर्फ प्रस्थान गरेको छ ।