गायक कसुरको ‘अलायम’ बजारमा (भिडिओसहित)
मकालु खबर
काठमाडौँ । गायक केशव कसुरको ‘अलायम’ गीत सार्वजनिक भएको छ । गीतमा गायक कसुरलाई लोकप्रिय गायिका अञ्जु पन्तले साथ दिएकी छन् । साहित्यकार सुवास सङ्गम राईको शब्दमा बनेको गीतमा अनिल कोयी राईको सङ्गीत संयोजन रहेको छ ।
किङ्ग स्टूडियोमा सुरेश राईले रेकर्ड गरेको गीत राजु कार्कीको मिक्स् मास्टरिङ्गमा बनेको हो । गीतले किराँती सभ्यता र मिथकअनुसारको आशीर्वादले ‘प्रेम’ भएको कुरा गरेको छ ।
गीतको भिडिओसमेत राम्रो बनेको प्रतिक्रिया दर्शकहरूले दिएको गायक कसुरले बताए । गीतको भिडिओमा उमेश राई उर्फ फुलन्देकी आमा, अनुशा राई, श्याम राई र कृष्टि राई फिचर्ड छन् ।
अनिल कोयी राईले नै निर्देशन गरेको भिडिओमा कमल राईको कोरियोग्राफी छ भने रमेश पराजुलीले क्यामेराको काम गरेका छन् । लिम्दुमी क्रिएसनमार्फत सार्वजनिक गरिएको भिडिओ अमृत चापागाईंले इडिट गरेका छन् ।
गायक कसुरले यसअघि नै वर्षौँ बित्यो विछोड भै, ग्रीन सिग्नललगायतका गीतहरू बजारमा ल्याइसकेका छन् ।
मकालु खबर
