पुनः जुटे कांग्रेसका तीन भाइ
मकालु खबर
काठमाडौँ । नेपाली कांग्रेसको १४औं महाधिवेशन नजिकिएसँगै सभापति पदका तीन आकांक्षी उपसभापति विमलेन्द्र निधि, महामन्त्री शशांक कोइराला र पूर्वमहामन्त्री प्रकाशमान सिंहबीचको भेटवार्ता बाक्लिएको छ । यसअघि नै चरणबद्ध रूपमा छलफल तथा संवादमा जुटेका निधि, कोइराला र सिंहबीच सोमबार (आज) पुनः छलफल भएको छ ।
- यो पनिः
निधि, सिंह र कोइरालाको निष्कर्ष : कांग्रेस महाधिवेशन निर्धारित मितिमै हुनुपर्छ
महाधिवेशन तोकिएकै मितिमा हुनुपर्छ : निधि, कोइराला र सिंह
पुनः जुटे निधि, कोइराला र सिंह
सिंहलाई भेट्न निधि र कोइराला चाक्सिबारी
निधि, कोइराला र सिंहबीच महाधिवेशनमा एकै टिम बनाउनेबारे छलफल
कोइराला, सिंह र निधिबीच महाधिवेशनकेन्द्रित छलफल
तीन नेताहरूबीच दिउँसोदेखि छलफल भइरहेको सिंहका प्रेस सहयोगी यूपी लामिछानेले बताए । निधिनिवास मध्यबानेश्वरमा उनीहरूबीच छलफल भइरहको छ । उनीहरूबीच महाधिवेशनमा सहमतिमा नेतृत्व चयनका बारेमा छलफल भइरहेको छ ।
कांग्रेसका संस्थापक नेताहरू बीपी कोइराला, गणेशमान सिंह र महेन्द्रनारायण निधिका छोराहरूबीच निरन्तर छलफल भएपनि नेतृत्वका लागि एकजनाको नाममा सहमति हुन सकेको छैन । महाधिवेशनमा सहमतिमा नेतृत्व चयनका लागि भन्दै निधि, कोइराला र सिंहबीच पटक–पटक छलफल हुँदै आएको छ ।
सिंहले भने आफूले उम्मेदवारी दिने घोषणा गरिसकेका छन् भने निधिले त्यसकै तयारीस्वरूप सम्पर्क कार्यालयसमेत स्थापना गरिसकेका छन् । उता कोइरालाले आफूले १३औं महाधिवेशनलगत्तै तयारी गरेको बताउँदै आएका छन् ।
आउँदो महाधिवेशनमा तीनैजनाले आफूलाई सभापतिको उम्मेदवारको रूपमा चिनाउँदै आएका छन् । केही दिनअगाडि कोइराला कोइरालानिवासमा भएको छलफलमा केन्द्रीय महाधिवेशन तोकिएकै मितिमा सम्पन्न गर्न पार्टीभित्र भूमिका निर्वाह गर्ने र सर्वसम्मत नेतृत्वका लागि सभापतिका सबै आकांक्षीसँग छलफल गर्ने निर्णय गरेका थिए ।
मकालु खबर
