मकालु खबर
ताजा, शुलभ, निष्पक्ष

उच्च रक्तचाप र मधुमेहका बिरामीले खोप लगाउन मिल्छ ?

काठमाडाैं । फागुन २३ गतेदेखि वृद्धवृद्धालाई खोप लगाउन सुरु गरिएको छ । ६५ वर्ष माथिका ज्येष्ठ नागरिकलाई लक्षित गरी सुरु गरिएको खोप अभियानमा पहिलो दिन नै उत्साहजनक सहभागिता रहेको थियो । आइतबार एकैदिन २ हजार ९३ वटा खोप केन्द्रबाट १ लाख ४३ हजार १४२ जनाले खोप लगाएका थिए ।

सोमबार शुक्रराज ट्रपिकल तथा सरुवा रोग अस्पतालमा मात्रै २२४ जना वृद्धवृद्धाले खाेप लगाएका थिए । जसमध्ये ११७ जना महिला र १०७ जना पुुरूष थिए । तीमध्ये १५६ जना दीर्घराेगी रहेकाे र कतिपय वृद्धवृद्धामा खाेपबारे धेरै द्विविधा रहेकाे पाइएकाे अस्पतालका सरुवा रोग विशेषज्ञ डा. अनुप बास्तोलाले जानकारी दिए ।

उनका अनुसार ११२ जना उच्च रक्तचाप, ५० जनामा मधुमेह, १६ जनामा थाइरोइडको समस्या, १५ जनामा मुटुसम्बन्धी अन्य समस्या, १२ जनामा चिल्लो (लिपिड) सम्बन्धी समस्या, फोक्सो सम्बन्धी समस्या ८ जनामा, मिर्गौला सम्बन्धी समस्या ४ जनामा, क्यान्सर उपचार सकेका ३ र १ जना नसा सम्बन्धी उपचार गरिरहेका वृद्धवृद्धा खाेप अभियानमा सहभागी थिए ।

खोपले काम गर्छ/गर्दैन वा लगाउँदा कुनै असर देखिन्छ कि देखिँदैन भन्नेभन्दा पनि भिन्नै सवालहरु उनीहरूले उठाएका थिए ।

यस्तो छ खोप लगाउन आएका वृद्धवृद्धा र परिवारका सदस्यको जिज्ञासामा डा. अनुप सुवेदीले दिएको जवाफ :

 

१. एसप्रिन वा/र क्लोपिलेट खानेले खोप लगाउन हुन्छ कि हुन्न ?
– ढुक्क भएर लगाउन मिल्छ
२. रगत पातलो बनाउने औषधि वारफारिन खानेले लगाउन मिल्छ ?
– आईएनआर माथिल्लो लिमिटभन्दा कम भएकाले लगाउन मिल्छ । खोप लगाई सकेपछि केही मिनेट खोप लगाएको ठाउँलाई थिचेर राख्न जरुरी हुन्छ ।
३. पेनिसिलिन एलर्जी भएकाले लगाउन मिल्छ कि मिल्दैन ?
– लगाउन मिल्छ ।
४. मैले प्रेसरको दबाई खाइरहेको छु, के खोप लगाउन सकिन्छ ?
– सकिन्छ ।
५. मैले मधुमेहको मुखबाट खाने दबाई र इन्सुलिन लिइरहेको छु, के मैले खोप लगाउन मिल्छ ?
– मिल्छ ।
६. मैले केही वर्ष पहिला स्तन क्यान्सरको अप्रेसन गरेको थिएँ, के खोप लगाउन मिल्छ ?
– मिल्छ ।
७. मेरो केही समय पहिला एपेनडिक्सको अप्रेसन भएको थियो, मैले खोप लगाउन मिल्छ ?
– मिल्छ ।
८. मैले क्यान्सरको केमो सकेको ३ महिना भयो, मैले खोप लगाउन मिल्छ ?
– मिल्छ ।
९. मेरो बुवा ९३ वर्षको हुनुहुन्छ के गरौं ?
– निर्धक्क खोप लगाउने ।
१०. म एचआईभी संक्रमित हुँ, एआरटी खाएको १२ वर्ष भयो, सबै ठिक छ । खोप लगाऊँ कि नलगाऊँ ?
– लगाउने ।
११. मेरो मामाको पेटमा एनुरिजम छ, लगाउन मिल्छ ?
– मिल्छ ।
१२. मलाई रुघाखोकी लाग्या छ, खोप लगाउन मिल्छ ?
– कोभिड टेस्ट गराउनु पहिला, अनि सल्लाह गरौँ ।
१३. मेरो बुवा मानसिक रोगको दबाइ खाँदै हुनुहुन्छ, खोप लगाउन हुन्छ ?
– लगाउन जरुरी छ ।
१४. मैले बाथको दबाई खाइरहेको छु के गरौं ?
– खोप लगाउने ।
१५. मलाई कोभिड पोजिटिभ भएको १ महिना भयो, खोप लगाउनुपर्छ अब ?
– लगाउनुपर्छ ।
१६. मैले प्रोस्टेट सम्बन्धी दबाई खाँदैछु, के गर्ने ?
– खोप लगाउने ।
१७. र मेरो स्पाइनल सम्बन्धी समस्या छ, दबाई खाँदैछु, के गर्ने ?
– खोप लगाउने ।
१८. मलाई किड्नी सम्बन्धी समस्या छ, दबाई खाँदैछु, खोप लगाउन मिल्छ ?
– मिल्छ ।
१९. मैले डायलाइस गर्दै छु, के गरौँ ?
– खोप लगाउने ।
२०. मिर्गौला प्रत्यारोपण गरेको छु, के गर्ने ?
– लगाउने ।
२१. मलाई रक्त क्यान्सर देखिएको छ, उपचार गराउँदै छु, खोप लगाउनु कि नलगाउनु ?
– आफ्नो उपचार विधि, अवस्था र रगतको जाँच गरेको रिपोर्ट देखाएपछि सरसल्लाहमा ।
२२. मैले चिल्लो कम गर्ने दबाईको सेवन गर्दैछु के मिल्छ ?
– लगाउन मिल्छ ।
प्रतिकृयाहरु
Loading...
Makalukhabar.com