नेकपाले ३ वर्षमा दिएको उपहार- दम्भ, द्वन्द्व र भ्रष्टाचार
काठमाडौँ । नेपाली कांग्रेसका प्रवक्ता विश्व प्रकाश शर्मा नेकपाले देखाएका रंगिन सपनाहरूको उडान पाइलट बनेका प्रधानमन्त्री ओलीकै कारण दुर्घटनामा परेकोले टिप्पणी गरेका छन् । सरकार गठन भएको तीन वर्ष पुगेको स्मरण गर्दै शर्माले बिहान ट्विटरमार्फत यस्तो टिप्पणी गरेको हुन् ।
नेकपालाई विश्वास गरी मत दिएका जनताको मनमा अहिले न बिर्सेँ तिमिलाई न पाएँ तिमिलाई, भन्ने गीतको भाव गुञ्जिरहेको शर्मा बताउँछन् । ‘न बिर्सेँ तिमिलाई न पाएँ तिमिलाई, बिना अर्थ दिलमा सजाएँ तिमिलाई ३ वर्षअघि दिएको मत सम्झँदै जनताको एकालापमा आज सायद यही गीत छ’ शर्माले व्यंग्य गर्दै भनेका छन् ।
नेकपाले यो तीन वर्षमा दम्भ, द्वन्द्व र भ्रष्टाचार दिएको उनको भनाई छ । ‘नेकपाले देशलाई तीन वर्षमा दिएको तीन उपहार- दम्भ, द्वन्द्व र भ्रष्टाचार हो,’ शर्मा अगाडि भन्छन्, ‘सरकारको सार समिक्षा यति नै । शब्दलाई दुःख दिएर शब्दकोषको फजुल खर्च गरिएन ।’
न बिर्सें तिमिलाई न पाएं तिमिलाई, बिना अर्थ दिलमा सजाएं तिमिलाई !
३ बर्ष अघि दिएको मत सम्झंदै जनताको एकालापमा आज सायद यहि गित छ l रंगिन सपनाहरुको हवाई उडान पाइलट @PM_Nepal कै कारण चुंडिएको चंगा जो भएको छ l
— Bishwa Prakash शर्मा (@bishwaprakash77) February 15, 2021
केपी शर्मा ओली नेतृत्वमा सरकार बनेको आज तीन वर्ष पुगेको छ । प्रधानमन्त्री ओलीले सिंहदरबारबाट तीन वर्षमा भए गरेका मुख्य कामहरू प्रेस बिफ्रिङ गर्ने तयारी छ ।
- सम्बन्धित समाचार
-सरकारका ३ वर्ष, उपलब्धि सार्वजनिक गर्दै प्रधानमन्त्री
-देशभर प्रदर्शन गर्दै कांग्रेस, देउवा बुटवलमा
-अधिनायकवाद तर्फ सरकारको अर्को फड्को : कांग्रेस