काेराेना संक्रमित युवतीसँगै फर्किएका मुसिकोटमा ४ जना भेटिए, होम क्वारेन्टाइनमा बस्न सुझाव

चैत्र १८, गुल्मी ।  गुल्मीको मुसिकोट नगरपालिकामा पनि कोरोना भाइरस (कोभिड १९) संक्रमित युवतीसँग एउटै एयरवेजबाट काठमाडौं आएका ४ जना भेटिएका छन् ।  

गत चैत्र ४ गते कतार एयरवेजबाट काठमाडौँ उत्रिएकी कोरोना संक्रमित युवतीसँगै मुसिकोटका ४ जना फर्किएको पाइएको हो । 

नगरपालिकाको वडा नम्बर–१ पौदी अमराईका एक जना काठमाडौँमा सुरक्षित रहेका छन् भने वडा नम्वर ३ को  बडागाउँमा एक जना, मुसिकोट नगरपालिका–६ को कुर्घामा एक जना र वडा नम्वर ८ को वामीमा एक जना रहेको नगरपालिकाका मेयर सोमनाथ सापकोटाले जानकारी दिए ।  

मेयर सापकोटाका अनुसार अहिले सबैलाई होम क्वारेन्टाइनमा बस्न भनिएको छ । उनीहरु सबैको स्वास्थ्य राम्रो छ ।  

नेपालमा हालसम्म पाँच जना कोरोना संक्रमित फेला परेका छन् जसमध्ये एकजना उपचारपछि निको भइसकेका छन् । विश्वभर ७ लाख बढी संक्रमित छन् ।