मकालु खबर
ताजा, शुलभ, निष्पक्ष

प्रदेशमा बलात्कारपछि हत्याका घटना बढ्दै गएको भन्दै सरकारको ध्यानाकर्षण

धनगढी, साउन १३ । प्रदेश नं ७ प्रदेशसभाका सदस्यहरुले प्रदेशमा बलात्कारपछि हत्याका घटना बढ्दै गएको भन्दै यस्ता घटना रोक्नका लागि आवश्यक पहल गर्न सरकारको ध्यानाकर्षण गराएका छन् ।

प्रदेशसभाको आइतबारको बैठकको विशेष समयमा नेकपाकी देवकी मल्ल थापाले कञ्चनपुरमा बालिकाको बलात्कारपछि हत्या गरिएको भन्दै यस्ता घटनामा संलग्नलाई कसरी तह लगाउने भन्नेबारे सरकारले सोच्नुपर्ने बताइन् ।

काँग्रेस संसदीय दलका नेता डा. रणबहादुर रावलले कैलाली र कञ्चनपुरमा बलात्कारपछि हत्याका घटना शृङ्खलाबद्धरुपमा बढ्दा जनता त्रसित र भयभित बनेको बताए ।

नेकपाका प्रमुख सचेतक तारा लामा तामाङ र प्रकाश रावलले कञ्चनपुरमा १३ वर्षीया बालिकाको बलात्कारपछि हत्या भएको घटनालाई लिएर विपक्षीले राजनीति गरेको आरोप लगाउँदै जघन्य अपराधका घटना हुन नदिन पहल हुनुपर्ने बताए ।

बैठकमा सार्वजनिक महत्वको विषयमा प्रदेश सरकारका आन्तरिक मामिला तथा कानूनमन्त्री प्रकाशबहादुर शाहले प्राकृतिक प्रकोपका कारण भएको जनधनको क्षति र जघन्य अपराधका घटनाप्रति सरकार दुःखित भएको उल्लेख गर्दै क्षतिबारे सदनलाई जानकारी दिए ।

मन्त्री शाहले सार्वजनिक महत्वको विषयमा सदस्यले उठाएका प्रश्नको जवाफ दिँदै सरकार प्राकृतिक प्रकोपजन्य घटनामा सचेत रहेको र अपराधका घटना हुन नदिन संवेदनशील बनेको बताए ।

बैठकमा विधायन तथा प्रदेश मामिला समितिका ज्येष्ठ सदस्य कृष्णराज सुवेदीले गाउँसभा र नगरसभाको कार्य सञ्चालन गर्न बनेको विधेयक २०७५ र जिल्लासभा तथा जिल्ला समन्वय समिति सम्बन्धमा व्यवस्था गर्न बनेको विधेयक २०७५ माथि दफावार छलफल भई तयार भएको प्रतिवेदन प्रस्तुत गरेका थिए ।

प्रदेशसभाको अर्को बैठक साउन १४ गते अपराह्न १ बजे बस्नेछ ।

प्रतिकृयाहरु
Loading...