मलेसियाः दुर्घटनामा परी एकको मृत्यु, १८ बेपत्ता
![](https://www.makalukhabar.com/wp-content/uploads/2023/10/Final-icon-Logo-2023.png)
![](https://www.makalukhabar.com/wp-content/uploads/2021/01/nophoto.png)
“
क्वालालम्पुर, असार १८ । मलेसियाको सीमा क्षेत्रमा पर्ने समुद्री इलाकामा भएको डुङ्गा दुर्घटनामा परी कम्तीमा एक जनाको मृत्यु भएको छ भने १८ जना हराइरहेका छन् ।
इन्डोनेसियाबाट गैरकानूनी आप्रवासीहरुलाई लिएर आएको डुङ्गा दुर्घटनामा परेको अधिकारीहरूले सोमबार जानकारी दिएका छन् ।
इन्डोनेसियाको बाटामबाट आइतबार राती मलेसियातर्फ आएको डुङ्गामा ४४ जना यात्रु रहेका थिए । डुङ्गाका यात्रुमध्ये २५ जनालाई उद्धार गरिएको अधिकारीहरूले बताएका छन् ।
“अहिले सम्म हराइरहेका मध्ये १८ जनाको खोजी तथा उद्धार कार्य भइरहेको छ,” एक उच्च अधिकारीले एएफपीसँग भने ।
प्रारम्भिक विवरणहरू अनुसार क्षमताभन्दा बढी यात्रु ल्याएको र खराव मौसमका कारण डुङ्गा दुर्घटना भएको अनुमान गरिएको छ ।
डुङ्गा दुर्घटना भएको ठाउँको १५० वर्गमिटर क्षेत्रमा खोजी कार्य जारी राखिएको छ । खोजी तथा उद्धारका लागि सरकारका विभिन्न निकायका १५० जना अधिकारीहरू, सात डुङ्गा र पानी जहाज तथा हेलिकोप्टर पनि परिचालन गरिएको छ ।
काम खोज्दै इन्डोनेसियाका अवैध आप्रवासीहरू वेला वेलामा यसैगरी मलेसिया जाने गर्दछन् ।
“
![](https://www.makalukhabar.com/wp-content/uploads/2023/10/Final-icon-Logo-2023.png)