पल्सर स्पोर्टस अवार्डको मनोनयनमा पर्ने खेलाडीको नाम सार्वजनिक

भाद्र १९, काठमाडौँ । अर्को साता आयोजना हुने पल्सर स्पोर्टस अवार्ड २०७३ को चार विधाका मनोनयनमा पर्ने खेलाडीको नाम सार्वजनिक भएको छ । आयोजक नेपाल खेलकुद पत्रकार मञ्चले आइतबार पत्रकार सम्मेलन गर्दै पल्सर स्पोर्टस अवार्ड अन्तर्गत वर्षका उत्कृष्ट खेलाडी महिला, पुरुष, युवा र प्रशिक्षकको मनोनयन सार्वजनिक गरेको हो ।

एसएमएस भोटिङका आधारमा विजेता घोषणा गरिने पिपुल्स च्वाइस अवार्डको मनोयन भने यसअघि नै सार्वजनिक भइसकेको थियो । ८ विधामा दिइने अवार्डमध्ये अन्य तीन विधाका लाइफ टाइम एचिभमेन्ट अवार्ड, स्पेशल अवार्ड र पारा एथलिट अवार्डको घोषणा भने भदौ २६ गते हुने कार्यक्रमकै दिन घोषणा गरिने बताइएको छ ।

मञ्चका सचिव राजु घिसिङको संयोजकत्वमा रहेको खेलाडी छनोट समितिले खेलाडी र प्रशिक्षकको वर्ष भरीको प्रदर्शन र प्राप्त उपलब्धिको आधारमा मनोनयन गरिएको जानकारी दिइएको छ । नेपाली खेलकुद क्षेत्रको प्रतिष्ठित अवार्डका रूपमा रहेको पल्सर स्पोर्टस अवार्डको वर्षको उत्कृष्ट महिला खेलाडीमा एथलेटिक्सकी कान्छीमाया कोजु र सरस्वती भट्टराई, आर्चरीकी ज्ञानु अवाले, फुटबलकी सावित्रा भण्डारी र ब्याडमिन्टनकी नङसल तामाङ मनोनयनमा परेका छन् । कान्छी पिपुल्स च्वाईस अवार्डको मनोनयनमा पनि रहेकी छिन् ।

पुरुषतर्फ राष्ट्रिय फुटबल टोलीका गोलकिपर किरण चेम्जोङ, ब्याडमिन्टनका रत्न जित तामाङ, क्रिकेटका शरद भेषावकर, भलिबलका मानबहादुर श्रेष्ठ र एथलेटिक्सका सोमबहादुर कुमालबीच प्रतिस्पर्धा हुने भएको छ । क्रिकेटका दीपेन्द्र सिंह ऐरी, फुटबलका अनन्त तामाङ, जुडोकी मनिता श्रेष्ठ प्रधान, भारोत्तोलनकी कमला श्रेष्ठ र भलिबलकी प्रतिभा मालीले वर्षको उत्कृष्ट युवा अवार्डका लागि मनोनयनमा परेका छन् । दीपेन्द्र पिपुल्स च्वाईस अवार्डको मनोयननमा पनि छन् ।

त्यस्तै वर्षको उत्कृष्ट प्रशिक्षकमा फुटबलका जापानी प्रशिक्षक ग्यातुको कोजी, मेघराज केसी, एथलेटिक्सका पुष्पराज ओझा, क्रिकेटका जगत टमाटा र ब्याडमिन्टनका किरण थापाबीच प्रतिस्पर्धा हुनेछ । यसअघि सर्वाजनिक भइसकेको दीपेन्द्र र कान्छीसँगै पिपुल्स च्वाइस अवार्डमा फुटबलका सुजल श्रेष्ठ, पौडीकी गौरीका सिंह र जुडोकी फुपु ल्हामु खत्री रहेका छन् ।

हंसराज हुलासचन्द एण्ड कम्पनी प्रालिको मुख्य प्रायोजन रहेको अवार्डलाई डिस मिडिया नेटवर्कको एक्सन स्पोट्र्स, साहस स्पोट्र्स, टिएचटी लाइभ ३३१३१, एभिन्यूज टेलिभिजन, सूर्य नेपाल, रुस्लान फुटबल, रोयल सिंगी होटेल, राष्ट्रिय खेलकुद परिषद्, नेपाल ओलम्पिक कमिटीले सहयोग रहेको मञ्चले जानकारी दिएको छ ।