तलब दिन नसकेपछि ५० खेलाडी तथा प्रशिक्षकको करार सम्झौता रद्द
तलब दिन नसकेपछि सशस्त्र प्रहरी बलले ५० खेलाडी तथा प्रशिक्षकको करार सम्झौता रद्द गरेको छ । खेलकुद कोष रित्तिएपछि वैशाख देखि नै सशस्त्र प्रहरीले सबै करार खेलाडी र प्रशिक्षकको सम्झौता रद्द गरेको हो ।
कल्याण कोषको रकम चलाउन नपाएपछि सम्झौता रद्द
स्रोतका अनुसार विगतमा कल्याण कोषबाट सशस्त्र प्रहरीले खेलाडीलाई आकर्षक तलब खुवाउँदै आएको थियो तर कल्याण कोषको खर्चमा अख्तियार दुरुपयोग अनुसन्धान आयोग लगायतका निकायबाट नियमन हुन थालेपछि सशस्त्रले कोषबाट बजेट मिलाउन नसकेको हो । सोही कारण खेलाडीको सम्झौता नै रद्द गर्नु परेको स्रोतले जनाएको छ ।
मासिक तलब नै दिएर खेलाडीलाई अनुबन्धित गरेपछि सशस्त्रको खेलकुद टिम बलियो भएको थियो । पुरुष र महिलाका क्रिकेट र फुटबल टिममा चर्चित खेलाडीलाई सशस्त्रले अनुबन्धित गरेको थियो । सम्झौता रद्द भएपछि टिम कमजोर हुने सशस्त्रको चिन्ता छ ।
सुशीलनरसिंह राणा, दीपक श्रेष्ठ, प्रकाश थपलिया, विश्व श्रेष्ठ, रमेश डंगोल, अञ्जन विष्ट, राजु योगी, मनमाया लिम्बू, अञ्जली योञ्जन, पारस खड्का, ज्ञानेन्द्र मल्ल, शक्ति गौचन, बसन्त रेग्मी, सुवास खकुरेल, पुथु बास्कोटा, सन्दीप लामिछाने, करण केसी, आरिफ शेख, सन्दीप सुनार, सन्दीप जोरा, अनिल शाह, अभिषेक बोहरा, निरा राजोपाध्याय, ऋतु कनौजिया, सोनु खड्का, इन्दु बर्मा, ममता चौधरी, पुष्पा भण्डारी, सरस्वती चौधरी, शिक्षा श्रेष्ठ, विजय थापा, जयन्त अवस्थी, टेकराज अवस्थी, चन्दन शाही, शिवसुन्दर गोथे, सरु लिम्बू, रेखा पौडेल, सुशीलासिंह ठकुरी, मुकुन्द महर्जन, अमरलाल मल्ल, रूपक नेपाली, विनिता राई, युवराज थापा, सुस्मिता तामाङ लगायत छन् ।
सम्झौता रद्द भए पनि सशस्त्रबाटै खेल्दै
करार सम्झौता रद्द भए पनि खेलाडीले सशस्त्र प्रहरीकै टिमबाट खेलिरहेको प्रवक्ता केसीले बताए । आर्थिक स्रोत जुटेमा उनीहरूलाई फेरि करार सम्झौता गरिने उनको भनाइ छ । करार सम्झौता रद्द भएसँगै पुरस्कार रकमबाट खेलकुद कोषमा पैसा नकाटिने भएको छ । यस अघि पुरस्कारको ३० प्रतिशत खेलकुद कोषमा पैसा कटौती हुने गरेको थियो ।