क्षारसूत्र चिकित्सा

काठमाडौँ — हाम्रो मुलुकमा एक दशकदेखि तल्लो मलद्वारको रोगको उपचार आयुर्वेदको क्षारसूत्र चिकित्सा पद्तिद्वारा पुन: नबल्झिने गरी सफलतापूर्वक भइरहेको छ । यस्तो उपचार लिनेहरूमा २०–८० वर्षका छन् । बालबालिकाहरूसमेत यो उपचारका लागि पुगिरहेका छन् ।

क्षारसूत्र चिकित्सा भनेको चक्कुको उपयोग नगरी गरिने शल्यक्रिया हो । आयुर्वेद विज्ञानको शल्यचिकित्सा विधिको अधिकृत ग्रन्थ ‘सुश्रुत संहिता’ मा पनि यसको वर्णन गरिएको छ । यसअन्तर्गत पाइल्स, फिस्टुला, क्रोनिक फिसर इन एनो, पाइलो नाइडल साइनस, रेक्टल पोलिप, पेरिएनल वाटर्स, पेरिएनल साइनस आदिको सफलतापूर्वक उपचार गरिन्छ । यो प्रक्रियामा सम्बन्धित ठाउँमा औषधीय धागो छिराइन्छ । त्यो धागोलाई घाउमा लगाउनाले वा त्यसले घाउ छेड्नाले पाइल्स काटिएर आफैँ झर्छ, फिस्टुलाको घाउ पनि बिनाकुनै अतिरिक्त उपचार स्वत: निको हुन्छ ।