चिकित्साशास्त्र अध्ययन संस्थानको डिनमा डा. शर्माको पुनर्वहाली

काठमाडौं, पुस २३ । त्रिभुवन विश्वविद्यालय शिक्षण अस्पतालमा कार्यरत डा. शशी शर्मा चिकित्साशास्त्र अध्ययन संस्थानको डिनमा पुनर्वहाली भएका छन् । सर्वोच्च अदालतले आइतबार शर्मालाई बर्खास्त गर्ने त्रिभुवन विश्वविद्यालयको निर्णय उत्प्रेषणको आदेशबाट बदर गरिदिएको हो ।

शर्मालाई त्रिभुवन विश्वविद्यालयको कार्यकारी परिषदले २०७० पुस २६ गते नियुक्त गरेको थियो। उनको चारवर्षे कार्यकाल आगामी बुधवार सकिँदैछ।

वरिष्ठलाई पाखा लगाई कनिष्ठलाई डिन नियुक्त गरिएको र सम्बन्धनको खेल भएको भन्दै डा. गोविन्द केसीले अनसन शुरु गरेपछि त्रिभुवन विश्वविद्यालयले शर्मालाई बर्खास्त गरेको थियो।

आफूलाई विना कारण बर्खास्त गरिएको भन्दै डा. शर्माले त्यसविरुद्ध सर्वोच्च अदालतमा रिट हालेका थिए।