युरोपमा मोडलिङ प्रतियोगितामा नेपाली चेली सेमीफाईनल नजिक

“

 असाेज ४, काठमाडाैं। युरोपको मोडलिंग क्षेत्रमा महत्त्वपूर्ण प्रतिस्पर्धाका रूपमा रहेको टप मोडल युरोप प्रतियोगितामा बेल्जियममा बसेर मोडलिंग गरिरहेकी नेपाली चेली योगिता थापा सेमीफाईनल नजिक पुगेकी छन् । युरोपेली युनियनको राजधानी बेल्जियमको ब्रसेल्समा हुने सेमीफाईनल छनौट आगामी अक्टोबर ७ मा हुँदैछ । युरोप भरीबाट मोडल हुन इच्छुक हजारौँ प्रतिष्पर्धीहरुका बिच यसअघि भएका दश भन्दा बढी अडिसनबाट छनौट भएका ३ सय जना भित्र उनी परिसकेकी छन् ।

अबको चरण पार गर्नका लागि पचास प्रतिशत भोटिंङ र पचास प्रतिशत व्यक्तिगत प्रस्तुतिका आधारमा सेमीफाईनल प्रवेश हुने भएकोले थापाले भोटका लागि अपिल गरिसकेकी छन् । विश्वव्यापी रूपमा अनलाइन भोटिंङ गर्न सकिने भएकोले संसारभरिका नेपालीहरूलाई भोटिंङ गरिदिन उनले अपिल गरेकी छन् । भोटिंङका लागि आयोजकले आगामी सेप्टेम्बर ३० सम्मको समयसीमा तोकेको छ ।

उक्त प्रतियोगितामा एसियाबाट उनको मात्र प्रतिनिधित्व रहेको छ । प्राप्त भोटिंङको आधारमा टप फाईभलाई सिधै फाईनल प्रवेश दिइने भएकोले सम्पूर्ण नेपालीहरूले भोटिंङ गरेर उनलाई फाईनलमै प्रवेश गराईदिन अनुरोध पनि गरेकी छन् । यद्यपि टप फाईभमा नपरेको अवस्थामा पनि व्यक्तिगत प्रस्तुतिकरणका आधारमा फाईनलमा पुग्ने वैकल्पिक अवस्था पनि रहने छ ।

को हुन् योगिता थापा ?
विगत एक दशक देखि बेल्जियमको लिएज सहरमा बस्दै आइरहेकी मोडल थापा काठमाण्डौमा जन्मिएकी हुन् । उनले भारत र मलेसियाबाट फेसन डिजाईनिङ र मोडलिङमा डिप्लोमा गरेकी छन् । यस अघि पनि उनले टप मोडल बेल्जियम प्रतियोगितामा तेस्रो उपाधि हासिल गरेकी थिइन् ।

विभिन्न संघसंस्था समेतमा आबद्ध उनी भर्खरै सम्पन्न एनआरएन बेल्जियमको उपाध्यक्षमा निर्वाचित भएकी छन् ।
उनलाई तलको लिन्कमा गएर भोट गर्न सकिन्छ ।

https://topmodeleurope.net/?contest=photo-detail&photo_id=5089

“