काठमाडौंलाई बस्न लायक शहर बनाउन एनआरएनएले सघाउने
मकालु खबर
काठमाडौं । राजधानी काठमाडौंलाई कसरी बस्नलायक शहर बनाउने भन्नेबारे गैरआवासीय नेपाली संघ र काठमाडौं महानगरपालिका बीच छलफल भएको छ । गैरआवासीय नेपाली संघका अध्यक्ष शेष घले र काठमाडौं महानगरपालिकाका मेयर विद्यासुन्दर शाक्य बीच सोमबार भएको भेटमा काठमाडौंलाई विश्वका बस्नलायक सहरको सूचीमा पार्नेगरी काम गर्न संघ र महानगरपालिका बीच सहकार्य गर्न सकिने सम्भावनाबारे कुराकानी भएको हो ।
घलेले सिस्टर सिटीको सम्बन्ध कायम गर्ने अवधारणा अनुसार केही नमूना शहरसँग सहकार्य गरी सुधारका काम थाल्न सकिने सुझाव समेत दिएका थिए । संघ र महानगरपालिका बीच बेग्लै सम्झौता गरी यो कार्यलाई अगाडी बढाउन उनले प्रस्ताव गरेका थिए । साथै उनले गैरआवासीय नेपालीहरुले सिकेको सीप र आर्जेको पूँजी नेपालको सवृद्धिमा लगाइरहेको भन्दै त्यसको ठूलो हिस्सा काठमाडौं महानगरपालिका भित्र रहेको जानकारी दिएका थिए ।
एनआरएनले गैरआवासीय नेपालीहरुको मातृभूमिप्रतिको लगावलाई अझ प्रगाढ पार्ने उदेश्यबाट काठमाडौं महानगरपालिका भित्र पर्ने बालुवाटारमा संघको प्रधान कार्यालय निर्माण गर्न लागेको जानकारी दिँदै भवन निर्माणमा महानगरपालिकाले आवश्यक सहयोग र सहजीकरण गर्ने विश्वास व्यक्त गरेका थिए ।
मकालु खबर
