डाइरेक्टर नहुँदा डा. साब’को रुवाबासी

काठमाडौँ । विभिन्न शक्ति केन्द्रमा करोडौं बुझाएर वीपी कोइराला स्वास्थ्य विज्ञान प्रतिष्ठान धरानको उपकूलपति हुन सफल प्रा.डा. राजकुमार रौनियार यति बेला कोकोहोलो गर्दै हिँडेका छन् ।
प्रतिष्ठानको अस्पताल निर्देशकमा आफ्नो मान्छे नियुक्त गर्न नसक्दा डा. रौनियारलाई आपत् परेको छ । उपकूलपति हुनका लागि विभिन्न शक्ति केन्द्रहरुमा १४ करोड बढी नजराना बुझाएका उनले त्यो पैसा मध्ये केही रकम राजधानीका ‘मिटरवाला’ व्यापारीसँग ऋण काढेका थिए । उपकूलपति भएपछि प्रतिष्ठानका मेडिकल उपकरण, औषधी सप्लायर्स र भवन निर्माणका ठेकेदारबाट कमिसन लिएर भए पनि ‘मिटर ब्याज’ तिर्छु भन्दै उनले ‘उपकूलपति’ मा जुवा नै खेले । तर, उनी त्यत्तिबेला हिस्स भए जतिबेला अस्पताल निर्देशकमा आफूले चाहेको व्यक्तिलाई गगन थापाले नियुक्ति गर्न मानेनन् । आफ्नो मातहतका डा. गौरीशंकर शाह, विएन यादव र एसएन सिंहलाई मन्त्री थापाले नरुचाएपछि डा. रौनियारको सातो गएको छ ।

मन्त्रालय स्रोतका अनुसार मन्त्री थापाले प्रतिष्ठानका गाइनो विभागका प्रमुख डा. मोहनचन्द्र रेग्मीलाई ल्याउन चाहेपनि डा. रौनियारले रेग्मीको नामै सिफारिस नगरेपछि ‘रडाँको’ मच्चिएको हो । डा. रेग्मीको नियुक्तिमा एमाले, काँग्रेस र माओवादीकै साथ रहेपनि रौनियारले रेग्मीलाई चलाउन नसक्ने भएकोले ल्याउन नचाहेका हुन् । एमाओवादीबाट अस्पताल निर्देशक हुन चाहेका डा. गुरु खनालसँग डा. रौनियारको दोस्ती राम्रो छैन । यसअघि प्रतिष्ठानका उपकुलपति भएका डा. वीपी दाससँग पनि उनले राम्रो व्यवहार देखाएका थिएनन् । प्रतिष्ठानमा सबैसँग निहु खोज्ने स्वभावका रौनियारका कारण धेरै रुष्ट हुँदै गएका छन् ।
प्रतिष्ठानको अस्पताल निर्देशकमा आफ्नै मान्छे राख्न पाए औलामा नचाउन पाउने र विभिन्न औषधी उपकरण खरिद, भवन निर्माण ठेक्काका चलखेल गर्न पाउने र एकै वर्षमा विभिन्न शक्ति केन्द्रमा बुझाएको पैसा असुल गर्न सकिने उनको सोच थियो । तर, अहिलेसम्म अस्पताल निर्देशक नियुक्त गर्न नसक्दा रौनियारलाई उपकूलपति पद ‘खाउँ भने दिनभरिको सिकार नखाउँ भने…’ भने जस्तो भएको छ । अस्पताल निर्देशक बनाई दिन्छु भनेर डा. गौरीशंकर शाहसँग २ करोड एड्भान्स लिएका रौनियारलाई डा. शाहले ‘कि डाइरेक्टर बनाउनु प¥यो की पैसा फिर्ता गर्नु प¥यो !’ भनेर ¥याख्¥याख्ती पार्न थालेका छन् । डा. रौनियारले भने शाहबाट लिएको २ करोड काठमाडौँका एक ‘मिटर ब्याजवाला’लाई बुझाई सकेको बुझिएको छ ।
आफ्नालाई नियुक्ति
डा. रौनियारले रजिष्ट्रार तुलबहादुर श्रेष्ठ र शिक्षाध्यक्षले आफूले भनेको नमानेकोले काम गर्न गाह्रो भएको भन्दै धमाधम आफ्ना नातेदारलाई प्रतिष्ठानका महत्त्वपूर्ण स्थानमा उपकूलपतिले नियुक्त गर्न थालेका छन् । उनले प्रतिष्ठानको मेट्रोनमा गयानन्द मण्डललाई नियुक्ति गरेका छन् । प्रतिष्ठानको डेपुटि अस्पताल निर्देशकमा काँग्रेस डा. मिनेन्द्र रिजालका भाइ पर्ने तथा स्वास्थ्यमन्त्री गगन थापाका भाइ हेमु थापासँगको सेटिङमा डा. पप्पु रिजाललाई डेपुटी अस्पताल निर्देशक बनाएका छन् । भने, सहायक डीनमा एमाओवादी केन्द्रका नेता टोप बहादुर बस्नेतका भाइ डा. मधुर बस्नेतलाई ल्याएका छन् ।
पिजी इन्ट्रान्समा डा. रौनियारको हस्तक्षेप
प्रतिष्ठानले हिजो (आइतबार) पोस्ट ग्राजुएटका लागि इन्ट्रान्स परीक्षा लियो । उनले त्यसमा समेत चलखेल गर्न खोजेका थिए । प्रतिष्ठानमा परीक्षा समितिले प्रश्न बैङ्कबाट ७० प्रतिशत र बाँकी ३० प्रतिशत प्रश्न परीक्षा समितिको गोप्य कोठामा जाने ब्यक्तिहरुबाट बनाउनु पर्ने प्रावधान छ । तर, डा. रौनियारले शिक्षाध्यक्ष प्रा.डा. विक्रम प्रसाद श्रेष्ठलाई हस्तक्षेप गर्दै प्रश्न बैङ्कबाट प्रश्नहरू नझिकी विज्ञहरुबाटै सबै प्रश्न बनाउन प्रस्ताव गरे । यसका लागि उनले सहायक डीन डा. मधुर बस्नेतलाई प्रयोग गरेका थिए । तर, शिक्षाध्यक्ष डा. श्रेष्ठले कुनै पनि हालतमा त्यस्तो नगर्ने बरु राजीनामा नै दिएर हिँड्ने अड्डी कसेपछि डा. रौनियार पछि हटेको प्रतिष्ठान स्रोतको दाबी छ ।
स्मरण रहोस् प्रश्न बैङ्कबाट प्रश्न लिनकालागि परीक्षा समितिले तीन देखि चार जना विज्ञहरुको टिमलाई गोप्य तवरबाट परीक्षा बैङ्कमा सञ्चार विच्छेद नै गरेर राख्दछ ।
प्रश्न बेच्ने रौनियारको षड्यन्त्र
यदि डा. रौनियारले भने जसरी प्रश्न बैङ्कबाट प्रश्नहरू नझिकी विज्ञहरुले मात्रै बनाएको भए उनले त्यो प्रश्नहरू भारतीय विद्यार्थीलाई बेच्ने तयारी गरेका थिए । यसका लागि डा. रौनियारले इनरुवाका सन्तोष मेहतामार्फत काम गराउन लागेका थिए । शिक्षाध्यक्षको अडानले डा. रौनियार फेल खाए ।
स्वास्थ्यमन्त्रीका विवादित विषय
स्वास्थ्यमन्त्री यति बेला धमाधम निर्वाचन आचार संहिता उलंघन गर्दै ब्याक डेटमा हस्ताक्षर गर्दै विभिन्न स्वास्थ्य प्रतिष्ठानमा आफ्ना अनुकूलका मान्छे भटाभट नियुक्ति गर्न थालेका छन् । उनले केही व्यापारीको स्वार्थमा लागेर यस्ता नियुक्ति दिन थालेका हुन् ।
वीपी प्रतिष्ठान धरान, कर्णाली प्रतिष्ठान र पाटन प्रतिष्ठानमा आफू निकटलाई नियुक्ति दिने तयारी गरिरहेका छन् ।
कर्णाली धरानको पूर्वाधार निर्माणको कन्सल्टेण्ट नियुक्तिमा उनले केही निश्चित व्यापारीलाई फाइदा हुने गरी सार्वजनिक खरिद नियमावलीलाई नै मिचेर काम गरेका छन् ।
केही समयअघि कर्णालीमा माओवादीको कोटाबाट डा. चिरन्जीवी वाग्लेका भाइ डा. राजेन्द्र वाग्लेलाई उपकुलपति बनाइयो । अहिले तीनै वाग्लेले रजिष्ट्रार नियुक्तिमा चलखेल गर्दा प्रतिष्ठान एक वर्षदेखि रजिष्ट्रार विहिन भएको छ । यता पाटन स्वास्थ्य विज्ञान प्रतिष्ठानमा पनि रजिष्ट्रार नियुक्तिको लफडा छ ।
वीर अस्पतालमा खरिद गर्न लागिएको रेडियोथेरापी मिसिनमा पनि ठुलै चलखेल भएको छ । मेसिन खरिद गर्न अस्पतालले टेण्डर खोलेर टेण्डर स्वीकृत भएको अवस्थामा केही व्यापारीले टेण्डर नै रद्द गराउने र मेसिन नै नकिन्ने परिपञ्च गर्न थालेका छन् । यसको फाइल मन्त्रालयको स्वास्थ्यमन्त्रीको टेबुलमा धुलो लागेर थन्किएको छ ।
हिजो स्वास्थ्य मन्त्रीले स्वास्थ्य मन्त्रालयमा पत्रकार सम्मेलन गरेर आफ्नो कार्यकालमा भएका राम्रा कामको फेहरिस्त त सुनाए । तर, पदाधिकारी नियुक्ति ढिलाइका विषयमा केही बोलेनन् ।