प्रचण्डलाई नेता शर्माको आठ प्रश्न–‘बालकृष्ण ढुंगेललाई समाएर बुझाईन्छ कि रक्षा गरिन्छ ?’

“

काठमाडौँ, असोज १९। नेकपा एमालेसँग आगामी निर्वाचनमा तालमेलपश्चात् पार्टी एकीकरणका लागि जसरी माओवादी केन्द्रका अध्यक्ष दगुरिरहेका छन् तर कार्यकर्ताहरू भने पिरमा छन् । प्रदेश र प्रतिनिधिसभाको चुनावी तालमेलमा एमाले–माओवादी केन्द्रबीच ६० र ४० को भाग बण्डामा सहमति हुँदा माओवादीका नेता–कार्यकर्ताहरू अबको दुई बाम एकताले निम्त्याउन सक्ने परिणामबारे चिन्तन मनन गर्न थालेका छन् ।

अहिले देखिएको राजनीतिक ध्रुविकरणले माओवादीलाई भन्दा एमालेलाई ऊर्जा थपेको भन्दै माओवादी केन्द्रका कार्यकर्ताहरू जोड घटाउँतिर लागिपरेका छन् भने माओवादी केन्द्र एमालेमा विलय भएको निष्कर्ष समेत निकाल्न थालेका छन् । माओवादीको एेजेण्डाले देशमा परिवर्तन ल्यायो तर एमालेमा विलय भयो भन्ने माओवादी केन्द्रका एकथरि कार्यकर्ताहरूको तर्क रहेको छ ।

माओवादी केन्द्रका नेता कार्यकर्ताले दुई दलबीच चुनावी तालमेलसँगै पार्टी एकीकरण गर्ने भइएपछि विभिन्न शङ्का, उपशंका र चिन्ता व्यक्त गरिरहेका बेला सचिवालय सदस्य नारायण शर्माले ८ ओटा प्रश्‍नको जवाफ नेतृत्वसँग मागेका छन् । नेतृत्वकर्तासँग उनले सोधेका प्रश्नहरू यस्ता छन् :

१. जनयुद्ध, जनयुद्ध नै रहन्छ कि आतंककारी गतिविधिमा दर्ज हुन्छ ?
२. जनयुद्धका सहिद, सहिद नै रहन्छ्न कि आतङ्कवादीमा दर्ज हुन्छ्न ?
३.अबको यात्रा समाजवाद हुन्छ कि सोसल डेमोक्रेसी ?
४. अब समाजवादको यात्रामा बल प्रयोगको समाजवादी सिद्धान्तले ठाउँ पाउँछ कि पाउँदैन ?
५. अबको समाजवादको मोडेल कस्तो हुनेछ ?
६. जनयुद्धकालिन मुद्दाले लखेटेर हैरान पारिएका बालकृष्ण ढुंगेलहरुलाई समाएर बुझाइन्छ कि रक्षा गरिन्छ ?
७. मधेसी दलित जनजाति आदिवासी र गरिबहरू को पहिचान के हुन्छ ?
८. मार्क्सवाद, लेनिनवाद, माओवाद मान्न पाइन्छ कि पाइदैन ?

“