अमेरिका–इरान सैन्य तनावप्रति संयुक्त राष्ट्रसंघका महासचिवद्वारा चिन्ता व्यक्त

एजेन्सी । संयुक्त राष्ट्रसंघका महासचिव एन्टोनियो गुटेरेसले खाडी क्षेत्रमा पुनः शुरु भएको सैन्य मुठभेडप्रति गहिरो चिन्ता व्यक्त गरेका छन् । पछिल्लो समय विकसित घटनाक्रमले इरान र अमेरिकाबीच भइरहेको कूटनीतिक प्रगतिलाई धरापमा पार्न सक्ने भन्दै उनले सचेत गराएका हुन् ।

महासचिवका प्रवक्ता स्टेफन दुजारिकले बुधवार आयोजित नियमित पत्रकार सम्मेलनमा महासचिवको तर्फबाट उक्त चासो व्यक्त गरेका हुन् । प्रवक्ता दुजारिकका अनुसार पछिल्लो २४ घण्टामा देखिएका सैन्य गतिविधिहरूले दुई देशबीचको कूटनीतिक संवादमा गम्भीर अवरोध सिर्जना गर्ने जोखिम बढाएको छ ।

महासचिव गुटेरेसले संवद्ध सबै पक्षलाई अधिकतम संयम अपनाउन, तनाव बढाउने कुनैपनि थप क्रियाकलापबाट टाढै रहन र परिस्थितिलाई सामान्य बनाउन तत्काल कदम चाल्न आह्वान गरेका छन् ।

यसका साथै उनले अन्तर्राष्ट्रिय कानुनको पूर्ण पालना गर्न, सर्वसाधारण र नागरिक पूर्वाधारको सुरक्षा सुनिश्चित गर्न तथा जलयात्राको अधिकार र स्वतन्त्रताको सम्मान गर्न समेत सबै पक्षलाई स्मरण गराएका छन् ।

महासचिवले इरान र अमेरिकालाई यथाशीघ्र वार्ताको प्रक्रियामा फर्किन र कुटनीतिक माध्यमबाट थाती रहेका विवादित विषयहरूलाई सम्बोधन गर्न जोडदार आग्रह गरेका छन् । सम्भावित द्वन्द्व रोक्न, स्थिरता कायम गर्न र यस समस्याको दिगो तथा व्यापक समाधानका लागि गरिने हरेक प्रयासमा सहयोग पुर्याउन संयुक्त राष्ट्रसंघ प्रतिबद्ध रहेको प्रवक्ताले स्पष्ट पारेका छन् ।