आनद्वारा द्रुत गतिमा परिवर्तन भइरहेको मिडिया र विज्ञापन व्यवसायबारे अन्तरक्रिया कार्यक्रम सम्पन्न

काठमाडौँ । नेपाल विज्ञापन संघ (आन) ले आफ्नो स्थापनाको ३६औँ वार्षिकोत्सवको मनाउने क्रममा आयोजित जेठ ३० देखि असार ३०, २०८३ सम्म Month of Creativity  कार्यक्रम अन्तर्गत गत शुक्रवार एक विशेष अन्तरक्रिया कार्यक्रम सम्पन्न गरेको छ ।

Evolving Media Landscape and Ever–Transitioning Advertising Business (परिवर्तनशील मिडिया परिदृश्य र निरन्तर रूपान्तरणकारी विज्ञापन व्यवसाय) शीर्षक दिइएको उक्त कार्यक्रम काठमाडौँको गौशाला स्थित होटल बेस्ट वेष्टर्न प्लसमा आयोजना गरिएको थियो ।

एड्सारो नेपालको सहयोग तथा एड क्लब नेपाल र आईएए नेपालको सहकार्यमा आयोजित कार्यक्रममा नेपाली मिडिया र विज्ञापन बजारमा विकसित भइरहेका नयाँ आयाम र चुनौतीहरू माथि सम्बन्धित क्षेत्रका दक्ष, र अनुभवी विज्ञहरूले छलफल तथा बिचार विमर्श गरेका थिए ।

अन्तरक्रिया कार्यक्रममा प्रविधिको तीव्र विकासले सिर्जना गरेका चुनौती र ती चुनौतीहरूलाई अवसरमा बदल्न नेपाली विज्ञापन व्यवसायी तथा पेसाकर्मीहरूले चालेका सकारात्मक कदमहरू बारे विशेष चर्चा भएको थियो ।

उपभोक्ताहरू फेसबुक, इन्स्टाग्राम, टिकटक जस्ता डिजिटल र सामाजिक सञ्जालमा केन्द्रित हुँदा परम्परागत सञ्चार माध्यमहरू (टेलिभिजन, प्रिन्ट र रेडियो) मा आउने विज्ञापनको हिस्सा घट्दै गएको र बजार असन्तुलित बनेको कुरालाई मुख्य चुनौतीको रूपमा औँल्याइयो ।

नेपालमा एआई, डाटामा आधारित मार्केटिङ र डिजिटल मार्केटिङका लागि आवश्यक दक्ष जनशक्तिको अभाव रहनु र शहरी तथा ग्रामीण क्षेत्रबीचको डिजिटल साक्षरताको खाडल विज्ञापन क्षेत्रको अर्को ठुलो चुनौतीका रूपमा छलफलमा सहभागीहरूको ठम्याई रहेको थियो ।

यी तमाम चुनौतीहरूका बीच पनि नेपाली विज्ञापन एजेन्सी र उद्यमीहरूले परम्परागत शैलीलाई छोडेर द्रुत गतिमा डिजिटल र इन्फ्लुएन्सर मार्केटिङलाई अँगाल्दै नेपाली बजार अनुकूल र स्थानीय भाषा–संस्कृति सुहाउँदो सृजनशील डिजिटल सामग्री निर्माणमा व्यवसायीहरूले सक्रियता बढाएकोमा विज्ञापन व्यवसायी तथा पेसाकर्मीहरूको सकारात्मकतालाई सर्हाना गरिएको थियो ।

आर्टिफिसियल इन्टेलिजेन्स र डीपफेक जस्ता अत्याधुनिक प्रविधिले ल्याउन सक्ने भ्रामक विज्ञापनको जोखिमलाई न्यूनीकरण गर्न जोड नेपालका विज्ञापन पसाकर्मीहरूले आचारसंहिता निर्माण, स्वनियमन र नवप्रवर्तनकारी प्रविधिको जिम्मेवार प्रयोगमा जोड दिनु पर्ने कुरा समेत छलफलमा सहभागीहरूले औँल्याए ।

छलफल पश्चात् कार्यक्रममा संघको सदस्य एजेन्सी एडसारो नेपाल प्रा. लि.का अध्यक्ष सुजन अधिकारीले विज्ञापनमा आधुनिक प्रविधिको प्रयोग सहित डिजिटल प्लेटफर्महरूमा विज्ञापन वितरण गर्ने सम्बन्धी कम्पनीले विकास गरेको प्रविधि र यसका उपयोगिताहरूका बारेमा एक विशेष प्रस्तुतीकरण दिएका थिए ।

कार्यक्रममा उपाध्यक्ष पंकज प्रधानले स्वागत मन्तव्य राख्दै सम्पूर्ण सहभागीहरूलाई स्वागत गर्नुका साथै कार्यक्रमको औचित्यमाथि प्रकाश पारेका थिए । कार्यक्रमको मुख्य आकर्षणको रूपमा रहेको प्यानल छलफलको सहजीकरण टेक्नोलाजीखबर डट कमका प्रधान सम्पादक अनुज राज ढुङ्गेलले सहजीकरण गरेको उक्त छलफलमा आनका कार्यकारी सदस्य दीपेन्द्र टण्डन, बार्हखरीका प्रधान सम्पादक प्रतीक मान प्रधान, डिजिटल विज्ञापन विज्ञ कश्यप शाक्य र र सारस बेभसेज रेडबुल नेपालका सेल्स एण्ड मार्केटिंग प्रमुख निर्भिक प्रधान रहेका थिए ।

कार्यक्रमको अन्त्यमा, एडसारो नेपालले विकास गरेको प्रविधिले विज्ञापन उद्योगलाइ मात्र नभएर समग्र नेपाली मिडिया तथा बिज्ञापनदाताहरुलाई समेत सजिलो, किफायती हुनुका साथै विज्ञापनको प्रभावकारिता मापन र पारदर्शिताको विकास गर्न सहयोग पुग्ने कुरा व्यक्त गर्दै नेपाल विज्ञापन संघका अध्यक्ष सुदिप थापाले सम्पूर्ण सहयोगी संस्था र सहभागीहरूलाई धन्यवाद ज्ञापन गर्दै कार्यक्रमको औपचारिक समापन गरे ।