विश्वकपबाट बाहिरिए लगत्तै कङ्गोका प्रशिक्षक देसाब्रेलाई पितृशोक

काठमाडौँ (एजेन्सी) । सन् २०२६ फिफा विश्वकप अन्तर्गत ‘राउन्ड अफ ३२’ को खेलमा पराजित भई प्रतियोगिताबाट बाहिरिए लगत्तै डीआर कङ्गो का मुख्य प्रशिक्षक सेबास्टियन देसाब्रे माथि ठुलो पारिवारिक बज्रपात परेको छ। इङ्गल्यान्ड विरुद्धको खेल सकिए लगत्तै उनले आफ्ना पिता गुमाएको दुःखद खबर प्राप्त गरेका हुन्।

स्थानीय समय अनुसार बुधवार अमेरिकाको एटलान्टामा खेलिएको निकै प्रतिस्पर्धात्मक खेलमा डी.आर. कङ्गो इङ्गल्यान्डसँग २-१ गोल अन्तरले पराजित भएको थियो। कङ्गोले खेलमा सुरुवाती अग्रता लिए तापनि इङ्गल्यान्डका कप्तान ह्यारी केनले दुई गोल फर्काएपछि कङ्गोको विश्वकप यात्रा समाप्त भएको थियो।

पत्रकार सम्मेलनमै अप्रत्याशित घोषणा

खेल समाप्त भएपछि आयोजित आधिकारिक पोस्ट-माच पत्रकार सम्मेलनमा प्रशिक्षक देसाब्रे पत्रकारहरूका प्रश्नको उत्तर दिइरहेका थिए। सोही क्रममा कङ्गो टोलीका मिडिया अफिसरले देसाब्रेका पिताको निधन भएको दुःखद घोषणा गरे।

प्रत्यक्ष प्रसारण भइरहेको पत्रकार सम्मेलनमै यो अप्रत्याशित र दुःखद खबर सुन्दा प्रशिक्षक देसाब्रे पूर्ण रूपमा स्तब्ध बनेका थिए। भावुक बनेका उनले मधुरो स्वरमा “Merci” (धन्यवाद) भन्दै तुरुन्तै पत्रकार सम्मेलन कक्ष छोडेका थिए।

विश्वभरबाट समवेदनाको ओइरो

चर्चित खेल पत्रकार फेब्रिजियो रोमानो सहित विश्वभरका सञ्चारमाध्यम र फुटबल समर्थकहरूले देसाब्रेप्रति गहिरो समवेदना प्रकट गरिरहेका छन्। रोमानोले आफ्नो सामाजिक सञ्जालमा लेख्दै भनेका छन्, “कङ्गोका मुख्य प्रशिक्षक सेबास्टियन देसाब्रेलाई खेल लगत्तै पितृ शोक परेको यो समाचार निकै हृदय विदारक छ। उनी आफ्नो परिवार र आफन्तहरूलाई भेट्न घरतर्फ प्रस्थान गरिसकेका छन्। यस दुःखद घडीमा हाम्रो प्रार्थना र गहिरो समवेदना देसाब्रेको साथमा छ।”

खेलको मैदानमा पराजय भोग्नु परेको केही मिनेटमै जीवनको सबैभन्दा ठुलो क्षति बेहोर्नु परेका देसाब्रेप्रति अहिले खेल जगतले सामाजिक सञ्जाल मार्फत सहानुभूति र शक्ति प्रदान गरिरहेको छ।