‘स्वर्णिम वाग्लेको अर्थ-राजनीतिक प्रस्तावमाथि समूहगत छलफल समेत गराइएन’
मकालु खबर
काठमाडौँ । चितवनको भरतपुरमा जारी राष्ट्रिय स्वतन्त्र पार्टी (रास्वपा) को पहिलो महाधिवेशनमा मङ्गलवार उपसभापति डा. स्वर्णिम वाग्लेले प्रस्तुत गरेको अर्थ–राजनीतिक प्रस्तावप्रति प्रतिनिधिहरूले गम्भीर असन्तुष्टि व्यक्त गरेका छन् ।
उपसभापति वाग्लेले प्रस्तुत गरेको पार्टीको अर्थ राजनीतिक प्रस्तावमाथि प्रतिनिधिहरुबीच समूहगत छलफल समेत नगराइएको भन्दै उनीहरूले असन्तुष्टि व्यक्त गरेका हुन् ।
महाधिवेशन प्रतिनिधि जनकराज जोशीले बन्दसत्रमा प्रस्तुत अर्थ–राजनीतिक दस्ताबेजमाथि पर्याप्त छलफल नभएको बताए । उनले संघीय शासन प्रणालीमाथि नै प्रश्न उठाउने खालको प्रस्ताव आएको भन्दै केही प्रदेशका नागरिकले त्यसलाई स्वीकार गर्न नसकिने समेत बताए ।
उनले उक्त अर्थ राजनीतिक प्रस्तावले मधेस, कर्णाली र सुदूरपश्चिम प्रदेशका नागरिकको हितविपरित रहेको आरोप पनि लगाए । ‘पार्टी उपसभापतिज्यूले बन्दसत्रमा प्रस्तुत गर्नुभएको अर्थ राजनीतिक दस्ताबेज कुनैपनि समूहमा छलफल नगराईकन, प्रतिनिधिहरूको बीचमा कुनैपनि किसिमको बहस भएन, गरिएको छैन । त्यो पनि समयको सीमाको कारण ठिकै छ भन्नेकुरा भयो । तर अर्थराजनीकि प्रस्ताव कस्तो आयो भने हाम्रो संघीय शासन प्रणालीमाथि नै अट्याक गर्नेगरी उक्त प्रस्ताव आएको छ । उक्त प्रस्ताव सुदूरपश्चिम, कर्णाली र मधेस प्रदेशका जनताले स्विकार्छन् जस्तो मलाई लाग्दैन’ उनले भने ।
प्रतिनिधिहरूको संख्या अपेक्षाभन्दा बढी भएकाले महाधिवेशनको प्रक्रिया अगाडि बढ्न नसकेको महाधिवेशन प्रतिनिधि धर्मराज ताम्राकारले बताए । उनले महाधिवेशनको कार्यतालिका व्यवस्थापनमा पार्टी नेतृत्व चुकेको कारण महाधिवेशन प्रतिनिधिलाई समेत गाह्रो हुने अवस्था आएको बताए ।
उनले भने ‘निर्वाचन हिजो नै हुनुपर्ने हो खासमा । तर प्रतिनिधिको संख्या सोचेभन्दा बढी आइदिएको कारणले अहिलेसम्म कुनैपनि निर्वाचन प्रक्रिया अगाडि बढ्न सकेको छैन । हामी टाढाबाट आएका प्रतिनिधिलाई व्यक्तिगत रूपमा केही समस्या पनि छन् । तर समग्रमा ठिकै छ ।’
महाधिवेशन प्रतिनिधि दयाराम अधिकारीले पार्टीले छोटो समयमा लिएको सङ्गठनात्मक स्वरूपजस्तो महाधिवेशन प्रभावकारी रूपमा अघि बढ्न नसकेको बताए । उनले पदाधिकारीमा सहमतिको प्रयास भइरहेकाले निर्वाचन प्रक्रिया लम्बिएको हुनसक्ने आशंका व्यक्त गरे । ‘यो चार पाँच वर्षको अवधिमा पार्टी विशाल भइसकेको छ । तर महाधिवेशनको व्यवस्थापनको सम्बन्धमा केही कमजोरीहरू देखिएका छन् । महाधिवेशन प्रतिनिधिको समस्या बुझेर जसरी व्यवस्थापन हुनुपर्थ्यो, त्यस्तो हुन सकेको छैन’ उनले भने ।
महाधिवेशन प्रतिनिधि प्रेमा थारुले महाधिवेशन समयमै सम्पन्न हुन नसकेको र प्रतिनिधि तथा उम्मेदवारको अन्तिम सूचीसमेत सार्वजनिक नभएको भन्दै व्यवस्थापन पक्ष कमजोर देखिएको बताइन् ।
उनले समयमै निर्वाचन प्रक्रिया सुरु हुन नसकेको विषयमा पार्टी नेतृत्व गम्भीर बन्नुपर्ने बताइन् । उनले भनिन् ‘हिजो नै सकिनुपर्ने महाधिवेशन आजसम्म सकिएको छैन । प्रतिनिधि र उम्मेदवारको अन्तिम सूची समेत आइसकेको छैन । व्यवस्थापनको सम्बन्धमा केही फितलो व्यवस्थापन भएकै हो ।’
महाधिवेशन स्थलमा भेटिएका अधिकांश महाधिवेशन प्रतिनिधिहरूले महाधिवेशनको निर्वाचन प्रक्रिया तत्काल सुरु गर्नुपर्ने धारणा राखेका छन् । केहीले महाधिवेशनको बन्दसत्रमा प्रस्तुत प्रस्तावमाथि गम्भीर प्रश्न समेत गरिन् ।
मकालु खबर
