प्रतिनिधिसभाः सांसदद्वारा हात्तीको आक्रमण, चिया निर्यात, साइबर सुरक्षालगायतका विषय उठान

काठमाडौँ । सांसदहरुले हात्तीको आक्रमण, चिया निर्यातमा भएको अवरोध, साइबर सुरक्षालगायतका विषय उठान गरेका छन् ।

प्रतिनिधिसभाको आजको बैठकको आकस्मिक समयमा सांसदहरूले सीमा विवाद, वैदेशिक रोजगारी, जलवायु परिवर्तन, यार्सागुम्बा संरक्षणलगायतका विषयमा सरकारको ध्यानाकर्षण गराएका हुन् ।

सांसद नरेन्द्रकुमार केरुङले पूर्वी नेपालबाट भारत निर्यात हुँदै आएको चियामा भारतीय पक्षले अवरोध गर्दा चिया उद्योगहरू सङ्कटमा परेको बताए ।

‘चिया उद्योग बन्द हुने अवस्था आउँदा श्रमिकले रोजगारी गुमाउनाका साथै उत्पादित चिया खेर जाने स्थिति सृजना भएको छ,’ उनले भने ‘चिया निर्यात समस्याको दीर्घकालीन समाधानका लागि कूटनीतिक पहल तीव्र बनाउन सरकारको ध्यानाकर्षण गराउन चाहन्छु ।’

सांसद निशा डाँगीले झापाको मेचीनगर क्षेत्रमा जङ्गली हात्तीको आक्रमण बढ्दै गएको बताए । ‘मेचीनगरकी पद्मा पौडेलमाथि हात्तीले आक्रमण गरेको तथा तीन बिघा मकैबाली नष्ट गरेको छ,’ उनले भने ‘भारतबाट नेपाल प्रवेश गर्ने हात्तीका कारण स्थानीय त्रसित बनेका छन् । समस्या समाधानमा सरकारले चासो बढाउनुपर्छ ।’

सांसद रचना खतिवडाले जेनजी आन्दोलनसँग सम्बन्धित झुटा मुद्दाहरू खारेज गर्न सरकारसँग माग गरे । सांसद आशिका तामाङले नवलपरासीको सुस्ता क्षेत्रमा देखिएको सीमा समस्याबारे सरकारको ध्यानाकर्षण गराइन् । गण्डक नदीले धार परिवर्तन गर्दा सीमा विवाद जटिल बन्दै गएको उल्लेख गर्दै उनले यस विषयमा छानबिन गरी आवश्यक कूटनीतिक पहल अघि बढाउन आग्रह गरिन् ।

सांसद सिर्जना श्रेष्ठले बढ्दो ‘साइबर बुलिङ’ रोक्न साइबर सुरक्षा प्रणालीलाई थप सुदृढ बनाउनुपर्नेमा जोड दिइन् । उनले साइबर अपराधविरुद्ध जनचेतना अभिवृद्धि तथा साइबर सुरक्षासम्बन्धी शिक्षाको विस्तार आवश्यक रहेको बताइन् ।

सांसद यज्ञबहादुर बोगटीले अछामकी मनिषा साउदको मृत्युबारे निष्पक्ष अनुसन्धान गरी दोषीमाथि कडा कारबाही गर्न सरकारसँग माग गरे । सांसद इन्दिरा रानामगरले जङ्गली हात्तीको आक्रमणका घटना बढ्दै गएको बताउँदै मानव–वन्यजन्तु द्वन्द्व न्यूनीकरणका लागि पूर्वसूचना प्रणाली विकास गर्नुपर्ने आवश्यकता औँल्याइन् । उनले हात्ती व्यवस्थापनका लागि दीर्घकालीन योजना बनाउन सरकारलाई आग्रह गरिन् ।

सांसद प्रकाशसिंह कार्कीले सोलुखुम्बुको लिपुखोलामा निर्माणाधीन जलविद्युत् आयोजनाका कारण डुबानको जोखिम तथा खानेपानीका मुहान सुक्ने समस्या देखिएको बताए । विकास र वातावरणबीच सन्तुलन कायम गरेर मात्रै आयोजना सञ्चालन गर्नुपर्ने उनको भनाइ थियो ।

सांसद बलावती शर्माले कैलालीको गोदावरी नगरपालिका–४ मा डिभिजन वन कार्यालयका कर्मचारीलाई भीरबाट धकेलिएको घटनाप्रति आपत्ति जनाउँदै निष्पक्ष छानबिनको माग गरिन् ।

सांसद अम्बिकादेवी सङ्ग्रौलाले पनि उक्त घटनाको विरोध गर्दै अमानवीय व्यवहारमा संलग्न व्यक्तिलाई छानबिनको दायरामा ल्याई कानुनी कारबाही गर्नुपर्ने बताइन् । सांसद खडकबहादुर बुढाले सो घटनाको निष्पक्ष छानबिन गरी दोषीलाई कारबाही गर्न सरकारसँग माग गरे ।

सांसद धनबहादुर बुढाले कर्णाली प्रदेशको आर्थिक मेरुदण्डका रूपमा रहेको यार्सागुम्बा सङ्कटमा परेको बताए । जलवायु परिवर्तन र अव्यवस्थित सङ्कलनका कारण उत्पादन घट्दै गएको तथा स्थानीयको आम्दानीमा असर परेको उनले उल्लेख गरे ।

सांसद निराशा चौधरी (डगौरा) ले वैदेशिक रोजगारीका क्षेत्रमा देखिएका समस्याप्रति सरकारको ध्यानाकर्षण गराउँदै विदेशमा अलपत्र परेका नेपाली नागरिकको उद्धारका लागि प्रभावकारी नीति तथा संयन्त्र निर्माण गर्नुपर्नेमा जोड दिइन् ।

आकस्मिक समयमा सांसदहरु खेमराज कोइराला, यसोदाकुमारी बराल, खड्कबहादुर शाही, भरतकुमार स्वार, गङ्गादेवी श्रेष्ठ, ऐनबहादुर महरले विभिन्न समसामयिक विषयमा आफ्नो धारणा राखे ।