टिकटकर तुल्सा अधिकारीलाई पुर्पक्षका लागि थुनामा पठाइयो

काठमाडौं । टिकटकर तुल्सा अधिकारीलाई पुर्पक्षका लागि थुनामा पठाउन ललितपुर जिल्ला अदालतले आदेश दिएको छ ।

ललितपुर जिल्ला अदालतका न्यायाधीश टेकनाथ गौतमको इजलासले अधिकारीलाई पुर्पक्षका लागि थुनामा पठाउने आदेश जारी गरेको हो ।

प्रहरीले उनलाई इन्टरपोलको सहयोगमा जेठ १७ गते थाइल्यान्डबाट पक्राउ गरी नेपाल ल्याएको थियो । त्यसपछि अनुसन्धानका लागि अदालतमा उपस्थित गराइएको थियो ।

अधिकारीविरुद्ध आपराधिक विश्वासघात, संगठित अपराध तथा सम्पत्ति शुद्धीकरणसम्बन्धी मुद्दा दर्ता भएको छ । उनी पछिल्लो समय चीनमा बस्दै आएकी थिइन् ।

प्रहरी अनुसन्धान अघि बढेपछि अधिकारीले सामाजिक सञ्जालमार्फत आफूविरुद्धको कारबाहीप्रति असन्तुष्टि जनाउँदै प्रतिक्रिया दिएकी थिइन् । उनले आफू नेपालमै रहेका बेला कुनै जानकारी वा खोजतलास नगरिएको र चीन पुगेपछि मात्र पक्राउ पुर्जी जारी भएको थाहा पाएको दाबी गरेकी थिइन् ।

यद्यपि, प्रहरीले उक्त दाबीप्रति स्पष्टिकरण दिँदै भ्रम फैलाउने प्रयास भएको जनाएको थियो ।

प्रहरीका अनुसार कुमार चिमोरिया नामका व्यक्तिले २०८२ साउन २२ गते प्रहरी वृत्त सातदोबाटोमा अधिकारीविरुद्ध ठगी तथा आपराधिक विश्वासघातको जाहेरी दिएका थिए । सोही जाहेरीका आधारमा अनुसन्धान अघि बढाइएको थियो ।

अनुसन्धानका क्रममा अधिकारीको संलग्नता सम्पत्ति शुद्धीकरणसम्बन्धी कसुरमा समेत देखिएपछि २०८२ कात्तिक २० गते सम्पत्ति शुद्धीकरण विभागको सुझाव लिएर थप अनुसन्धान गरिएको थियो ।

प्रहरीले उनीविरुद्ध ६ करोड ५२ लाख २९ हजार ७५ रुपैयाँ बराबरको ठगी तथा सम्पत्ति शुद्धीकरणको अभियोगमा मुद्दा दायर गरेको छ ।

अदालतको पछिल्लो आदेशसँगै अधिकारी अब मुद्दाको अन्तिम टुंगो नलागेसम्म पुर्पक्षका लागि थुनामा रहनेछिन् ।