आगामी निर्वाचनमा कम्तीमा १ सय स्थानीय तहको प्रमुखमा महिला उम्मेद्वार बनाउनेछौँ: गगन थापा

काठमाडौँ । नेपाली काँग्रेसका सभापति गगन थापाले आगामी वर्ष हुने स्थानीय तहको निर्वाचनमा कम्तीमा १ सय स्थानीय तहको प्रमुखमा महिला उम्मेद्वार बनाउने बताएका छन् ।

शनिवार आयोजित नेपाल थारु संघको अधिवेशनमा उनले पार्टीले महिलाको राजनीतिक प्रतिनिधित्व बढाउने तयारी थालेको बताएका हुन् ।

आगामी निर्वाचनमा ७५३ स्थानीय तहमध्ये कम्तीमा १०० पालिकामा नेपाली काँग्रेसको तर्फबाट महिला मेयर वा अध्यक्ष उम्मेदवार उठाउने लक्ष्यका साथ काम गर्नुपर्ने उनको भनाई छ । उक्त लक्ष्य हासिल गर्न अहिलेदेखि नै महिला नेतृत्व विकास, प्रशिक्षण र उम्मेदवार तयारीमा लाग्नुपर्ने उनले बताए ।

उनले उम्मेदवार छनोट र तयारीलाई व्यवस्थित बनाउन पार्टीले निर्वाचन ब्यूरो गठन गरेको जानकारी दिए । साथै, नेतृत्व विकासका लागि ‘लीडरशिप एकेडेमी’ नामक छुट्टै संरचना स्थापना गरिएको र त्यसको लागी छिट्टै खुला आह्वान गरिने बताए । उनकाअनुसार स्थानीय तहको निर्वाचन लड्न चाहने नयाँ वा पुनः उम्मेदवार बन्न इच्छुक व्यक्तिले अनिवार्य रूपमा लीडरशिप एकेडेमीमा भर्ना भई निर्धारित कोर्स पूरा गर्नुपर्नेछ । कोर्स पूरा गरेपछि मात्रै उम्मेदवारका रूपमा योग्य मानिने उनले बताए ।

महिला उम्मेदवारको संख्या बढाउन अहिलेदेखि नै बढीभन्दा बढी महिलालाई नेतृत्व विकास कार्यक्रम र प्रशिक्षणमा सहभागी गराउन आवश्यक रहेको उनको भनाई छ । पार्टीले आगामी निर्वाचनमा विभिन्न समुदायको व्यापक प्रतिनिधित्व सुनिश्चित गर्ने लक्ष्य राखेको पनि उनले जानकारी दिए ।

उनले भने ‘अर्को साल निर्वाचन छ, स्थानीय चुनाव आउँछ, प्रदेशको चुनाव आउँछ, यो पटक कम्तीमा पनि ७५३ मध्ये हामीले १०० पालिकामा नेपाली काँग्रेसको पार्टीको तर्फबाट मेयर अथवा अध्यक्षको उम्मेद्वार महिला बनाउनेगरी काम गर्नुपर्नेछ, अहिलेदेखि काम गरौँ, अहिलेदेखि कोसिस गरौँ । यसको लागि हामी सबै लाग्नुपर्छ । अहिलेदेखि आफैँ मेहनत गर्नुपर्नेछ, काम गर्नुपर्नेछ, कोसिस गर्नुपर्नेछ, लाग्ने हो भने गर्न सकिन्छ । यसको लागि हामीले इलेक्सन ब्युरो भनेर बनाएका छौँ । हाम्रा पुष्पा भुषालजीले त्यसको नेतृत्व गर्नुभएको छ । हामीले अहिले नेतृत्वको एउटा छुट्टै युनिट बनाएका छौँ, लीडरशिप एकेडेमी भनेर, जसमा पार्टीको तर्फबाट अब हामी केही दिनमा यसको खुला आह्वान गर्छौँ । ७५३ पालिकामा निर्वाचन लड्न चाहने, इच्छा राख्नुभएको कोही पनि हुनुहुन्छ, म उम्मेदवार बन्न चाहन्छु भनेर कोही अहिले दोहोरिन चाहनुभएको छ वा नयाँ उम्मेदवार बन्न चाहनुभएको छ भने अनिवार्य रूपमा लीडरशिप एकेडेमीमा भर्ना हुनैपर्छ र एउटा कोर्स पूरा गर्नैपर्छ । त्यो कोर्स पूरा गरिसकेपछि मात्रै त्यसका निम्ति योग्य बनिन्छ । त्यसैले त्यहाँ महिला बनाउने हो भने हामीले अहिलेदेखि नै बढी भन्दा बढी महिला साथीहरूलाई त्यहाँभित्र कोर्समा हामीले भर्ना गराउनुपर्छ । त्यो गराए मात्र बल्ल भोलि गर्ने कुरा हुन्छ । यो पटक हामीले बढी भन्दा बढी समुदायको प्रतिनिधित्व हुने गरीकन नेपाली काँग्रेस पार्टी उम्मेदवार लिएर निर्वाचनमा जाने अवस्था बनाऔँ भन्ने हामीहरू चाहन्छौँ ।’

उनले नेपाल थारु संघलाई पनि सम्भावित उम्मेदवारको खोजी, प्रोत्साहन, प्रशिक्षण लगायतका काममा सहभागी हुन आग्रह गरे । योग्य व्यक्तिहरूलाई निर्वाचन ब्यूरो र लिडरसिप एकेडेमीसँग जोडेर नेतृत्व विकासमा सहयोग गर्न सम्पूर्ण भ्रातृसंस्था लाग्नुपर्ने उनको भनाई छ । सभापति थापाले अधिवेशन नभएका भातृसंस्थाहरुको नेतृत्व छिट्टै चयन हुने बताए ।

नेपाल विद्यार्थीसंघ लगायत नेतृत्व खाली रहेका भ्रातृसंस्थाको एक दुई दिनभित्रै नेतृत्व चयन गरिने उनले जानकारी दिए ।