भीषण गर्मीका बाबजुद नयाँ दिल्लीका बाख्रा बजारमा ग्राहकको उल्लेख्य चहलपहल

एजेन्सी । भारतको राजधानी नयाँ दिल्लीमा भीषण गर्मीका बाबजुद इद–अल–अधा (बकर इद) पर्वको पूर्वसन्ध्यामा पशु बजारहरूमा व्यापक चहलपहल देखिएको छ । पर्वलाई लक्षित गरी सहरका विभिन्न स्थानमा अस्थायी पशु बजारहरू स्थापना गरिएका छन् ।

भारतका विभिन्न प्रान्तहरूबाट ल्याइएका विभिन्न जातका खसी, बोका तथा भेडाहरू छान्न र मूल्यका लागि बार्गेनिङ गर्न क्रेताहरूको ठूलो उपस्थिति रहेको छ। दिउँसोको चर्को गर्मीका कारण साँझपख तापक्रम केही घटेसँगै बजारहरूमा ग्राहकको चाप अझ बढ्ने गरेको पाइएको छ ।

स्थानीय व्यापारीहरूका अनुसार बलिदानको पर्वका रूपमा चिनिने यस उत्सवका लागि स्वस्थ र उन्नत जातका पशुहरूको माग उच्च रहेको छ । मौसम प्रतिकूल रहे तापनि व्यापारिक गतिविधि उत्साहजनक रहेको व्यवसायीहरूको भनाइ छ ।

इस्लामिक पात्रोअनुसार इद–अल–अधा सबैभन्दा पवित्र पर्वहरूमध्ये एक मानिन्छ । सामूहिक प्रार्थना, दान र पशु बलिका माध्यमबाट मनाइने यो पर्व विशेषगरी भक्तिभाव र गरिब एवं असहायहरूसँग खुशी साटासाट गर्ने उद्देश्यमा केन्द्रित रहने गर्दछ ।