एउटा ग्यास कम्पनीको सिलिण्डर अर्कोसँग साट्दा ५ सय तिर्नुपर्छ, यसलाई हटाईयोस्ः सांसद देवकोटा
मकालु खबर
काठमाडौँ । नेकपा एमालेकी सांसद सम्झना देवकोटाले बजारमा ग्यास पाउन नै मुस्किल बन्न थालेको बताएकी छन् ।
राष्ट्रिय सभाको बुधवार बसेको बैठकको विशेष समयमा उनले बजारमा धेरै ग्यास कम्पनीहरू भएपनि उपभोक्ताले सहज रूपमा ग्यास प्राप्त गर्न नसकेको गुनासो गरिन् ।
उनले ग्यास पाएपनि कम्पनीहरूले अर्को कम्पनीको सिलिण्डर साटासाट गर्न नमानेको बताइन् । केही साटेपनि अतिरिक्त पाँच सय रुपैयाँ शुल्क बुझाउनुपर्ने हुँदा उपभोक्ता थप पीडित भएको उनको भनाई छ । ग्यास कम्पनीहरूबीच समन्वय गरी उपभोक्तालाई अतिरिक्त शुल्क बिना सहज रूपमा सिलिण्डर साट्न पाउने व्यवस्था मिलाउन उनले सरकारसँग माग गरे ।
मध्यपूर्वको द्वन्द्वले पेट्रोलियम पदार्थ र ग्यासको मूल्यमा भएको वृद्धिले नेपालमा महँगी चुलिएको बताएँ । दैनिक उपभोग्य वस्तुको मूल्य अस्वाभाविक रूपमा बढ्दा सर्वसाधारणको भान्सा प्रभावित भएको र न्यून तथा मध्यम आय भएका परिवार प्रत्यक्ष मारमा परेको उनको भनाई छ ।
उनले भनिन् ‘मध्येपूर्वमा भइरहेको युद्धको कारण त्यहाँ रहेका नेपालीहरूको जीवन असुरक्षाप्रति गम्भीर चिन्ता व्यक्त गर्दछु । त्यस क्षेत्रमा रहेका नेपालीहरूको सुरक्षा सुनिश्चितताको लागि नेपाल सरकारको ध्यानाकर्षण गराउन चाहन्छु । सोही युद्धको कारण पेट्रोलियम पदार्थ र ग्यासको चरम मूल्य वृद्धिले दैनिक उपभोग्य सामाग्रीमा महँगी बढेको कारणले नेपालीको चुल्हो निभ्न लागेको छ, म यसमा सरकारको ध्यानाकर्षण गराउन चाहन्छु । बजारमा अहिले धेरै ग्यासका कम्पनीहरू छन्, अहिले पनि ग्यास पाउनको लागी हामीले धेरै कष्ट भोग्नुपरेको छ । एउटा कम्पनीले अर्को कम्पनीको सिलिण्डर फेरबदल गर्न मान्दैन, गरिहाले भने पनि ५ सय रुपैयाँ तिरेर मात्रै ग्यास सिलिण्डर परिवर्तन गर्नुपर्छ । यो हेर्दा सामान्य विषय जस्तो लाग्न सक्छ, तर यो न्यून आय भएका र मध्यम वर्गका परिवारको लागी दैनिक जीवनको अप्ठ्यारो विषयमध्ये पर्छ । म यी कम्पनीहरूको ग्यासलाई साट्दाखेरि पैसा नलिने गरि फेर्न पाइने सहज अवस्था बनाउन नेपाल सरकारको ध्यानाकर्षण गराउन चाहन्छु ।’
उनले मध्यपूर्वमा रहेका नेपालीहरूको जीवन जोखिममा परेको उल्लेख गर्दै उनीहरूको सुरक्षाका लागि आवश्यक कूटनीतिक पहललाई गर्न पनि सरकारसँग माग गरिन् ।
मकालु खबर
