इरानी आक्रमणको जवाफ दिने साउदीको चेतावनी
मकालु खबर
काठमाडौं । साउदी अरबले आफ्नो राष्ट्रिय सुरक्षा र नागरिकको रक्षाका लागि आवश्यक पर्ने जुनसुकै कदम चाल्न तयार रहेको घोषणा गरेको छ । रियादस्थित अमेरिकी दूतावासमा सोमबार भएको ड्रोन आक्रमणपछि विकसित घटनाक्रमलाई मध्यनजर गर्दै साउदी अरबले यस्तो कडा टिप्पणी गरेको हो ।
साउदी प्रेस एजेन्सी (एसपीए) का अनुसार, साउदी मन्त्रिपरिषद्ले एक विज्ञप्ति जारी गर्दै इरानबाट हुनसक्ने सम्भावित आक्रमणको प्रतिकार गर्न र आफ्ना सहयोगी राष्ट्रहरूको सुरक्षामा सबै प्रकारका सामर्थ्य परिचालन गर्न राज्य पूर्ण रूपमा तयार रहेको स्पष्ट पारेको छ ।
सोमबार रियादस्थित अमेरिकी दूतावास परिसरमा दुईवटा ड्रोनले शक्तिशाली प्रहार गरेका थिए । अमेरिकी र साउदी अधिकारीहरूले दूतावासमा ड्रोन खसेको पुष्टि गरिसकेका छन् । रोयटर्सका अनुसार उक्त दूतावासभित्र रहेको अमेरिकी केन्द्रीय खुफिया एजेन्सी (सीआईए) को कार्यलयलाई लक्षित गरी सो आक्रमण गरिएको हुनसक्ने प्रारम्भिक अनुमान गरिएको छ, यद्यपि यसबारे आधिकारिक पुष्टि हुन बाँकी छ ।
आक्रमणबाट दूतावासको भौतिक संरचनामा गम्भीर क्षति पुगेको छ । वासिङ्टन पोस्टले प्राप्त गरेको अमेरिकी विदेश मन्त्रालयको आन्तरिक रिपोर्ट अनुसार, ड्रोन प्रहारबाट दूतावासको छतको एक हिस्सा भत्किएको छ भने भवनभित्र धुवाँ फैलिएर ‘प्रदूषित’ बनेको छ । दूतावास प्रशासनले त्यहाँ कार्यरत कर्मचारीहरूलाई तत्काल सुरक्षित स्थानमा बस्न (सेल्टर इन प्लेस) निर्देशन दिएको छ ।
साउदी अरबले इरान समर्थित समूहहरूबाट हुनसक्ने आक्रमणलाई मध्यनजर गर्दै आफ्नो सुरक्षा संयन्त्रलाई उच्च सतर्कतामा राखेको छ । मन्त्रिपरिषद्को पछिल्लो बैठकले इरानी सैन्य सक्रियता र त्यसले क्षेत्रीय स्थिरतामा पुर्याउन सक्ने आँचप्रति चिन्ता व्यक्त गर्दै आफ्ना सहयोगीहरूको पक्षमा उभिने प्रतिबद्धता दोहोर्याएको छ ।
अमेरिकी दूतावासमा भएको यो आक्रमणले मध्यपूर्वमा अमेरिका, साउदी अरब र इरानबीचको सम्बन्धलाई थप तनावपूर्ण बनाएको छ । हालसम्म कुनै पनि समूहले यस आक्रमणको औपचारिक जिम्मेवारी नलिए पनि साउदी अरबले यसलाई सिधा इरानी खतराको रूपमा लिएको छ ।
मकालु खबर
